Bıyl jetisýlyq sharýalar 11 myń gektarǵa jýyq alqapqa kúrish ekti
TALDYQORǴAN. QazAqparat - Bıyl Almaty oblysynyń sharýalary 10 581 gektar jerge kúrish ekti. Qazir Jetisýdyń aq marjanyn orý naýqany qyzý júrip jatyr. Búginde astyqtyń úshten bir bóligi qambaǵa quıyldy, dep habarlaıdy QazAqparat tilshisi.
Bıyl kúrishti ólke sanalatyn Balqash aýdanynyń sharýalary 8 myńnan astam gektarǵa kúrish septi. Qazir orý naýqany qarqyndy júrip jatyr. Dıqandar aldymen daqyldy shaýyp, qulatyp alady. Sosyn birneshe kún kúrish tanaptary keptiriledi. Odan keıin baryp, kombaındar jınaıdy. «Birlik» agrofırmasy bıyl ár gektardan 40-41 tsentnerden ónim alyp jatyr. Keıbir tanaptarda ónimdilik odan da kóp.
«Dándi-daqylǵa jalpy aýdan boıynsha 126 mln teńge sýbsıdııa tólendi. Jalpy negizinen kúrishtiń gektaryna, arpa-bıdaıdyń gektaryna, kóp jyldyq shóptiń gektaryna jylda memleket tarapynan sýbsıdııa tólenip kele jatyr», deıdi Balqash aýdanynyń ákimi Ǵalym Toqpeıisov.
Aı sońyna deıin aýdanda kúrish tolyǵymen jınalyp bitedi. Óńir dıqandary ishki naryqty qamtyp qana qoımaı, kúrishti kórshi elderge eksporttaýdy da josparlap otyr.
