Bıyl Jetisý oblysynda qant qyzylshasynyń alqaby eki ese artty

TALDYQORǴAN. QazAqparat – Bıyl Jetisý oblysynda qant qyzylshasynyń alqaby eki ese artty. Byltyr túrli sebeptermen nebári 4 myń gektarǵa tátti túbir ekken sharýalar bıyl 8 myń gektarǵa dán-daqyl sebýge kiristi, dep habarlaıdy QazAqparat tilshisi.

Aıta ketý, kerek egistik kólemin ulǵaıtýǵa aryqtar men kanaldardy tazartý jumystary da septigin tıgizdi. Máselen, Qaratal aýdanyndaǵy sharýashylyqtyń egis alqaby 300 gektardan asady. Bıyl jerdiń úshten bir bóligine qant qyzylshasyn egý bastaldy. Qojalyq basshysy tátti túbirdiń sapaly sortyn synap kórmek. Aıtýynsha, erekshe óńdeýden ótken bul tuqymdy aramshóp baspaıdy. Demek jazda qosymsha jumys kúshi qajet bolmaıdy.

«Qant qyzylshasy ónimderdiń ishinde eń paıdaly, paıdasyn kóp beretin ónim. Biz 2006 jyldary 200 gektar egip, 7 myń tonnaǵa deıin ónim alyp, ótkizetinbiz», - dedi sharýa qojalyǵynyń jetekshisi Baıbazar Qanabatyrov.

Jalpy Qarataý aýdanynda bıylǵy egistik kólemi 23 myń gektarǵa jýyq. Basym bóligi dándi jáne maıly daqyl. Al qant qyzylshasyna 1100 gektar josparlanǵan. Sharýalar byltyr da osyndaı alqapqa tátti túbir sebý mejelegen. Biraq sý tapshylǵy jospardan shyǵýǵa múmkindik bermedi.

Aryq, kanaldardyń arnasyn tazartýǵa 13 mlrd 600 mln teńge bólingen. Jumystardyń birinshi kezeńi bastalyp ta ketti. Qazir jer-jerde qamys basqan arnalar tazartylyp, eski aryq júıelerindegi astaýlar alynyp jatyr. Jumystardyń birinshi kezeńi aıaqtalǵanda 4500 myń gektar alqapqa sý kelýi kerek. Merdigerler tazartý jáne aryqtardy qalpyna keltirý jumystary sýarý maýsymyna kedergi bolmaıtynyn aıtýda.