Bıyl Jetisý oblysyna 5,5 myńnan asa sheteldik azamat kelgen
Jyl basynan beri óńirde kóshi-qon zańnamasyn buzǵany úshin 2694 adam jaýapkershilikke tartyldy. Tártip buzýshylardyń jalpy sanynan 696 shetel azamaty bolsa, 1998-i –qazaqstandyqtar.
«Bıyl bizdiń derekterimiz boıynsha oblys aýmaǵyna 5520 sheteldik azamat kirdi. Olar kóshi-qon qyzmeti bólimshelerinde tirkelgen. Onyń ishinde alys shetelderdiń turǵyndary – 318, TMD elderinen – 5202. Aımaqqa kóbinese Ózbekstan azamattary keldi. Olardyń sany 4633 adam, sondaı-aq 375 Reseı jáne 277 QHR azamattary. Sonymen qatar, 248 sheteldik, negizinen QHR azamattary, vızalaryn zańdy túrde uzartyp, tirkeý jáne habarlama arqyly oblys aýmaǵynda tirkeldi», – delingen Jetisý oblystyq kóshi-qon qyzmeti basqarmasynyń habarlamasynda.
Kóshi-qon jelisi boıynsha zań buzýshylyqtar negizinen josparlanǵan profılaktıkalyq is-sharalar barysynda anyqtalady. Sheteldik jumys kúshi jıi paıdalanylatyn bazarlarǵa, qurylystarǵa jáne basqa da obektilerge asa nazar aýdarylady. Sheteldik azamattardyń ýaqytsha turǵylyqty jeri, tirkelgeni, kelý maqsaty jáne taǵy basqa jaǵdaıda tekseriledi. ıAǵnı, olardyń oblysqa týrıst nemese eńbek mıgranttary retinde nemese basqa da sebeptermen kelgeni de muqııat tekseriledi. Otandastar arasynda da kóshi-qon zańnamasyn buzý faktileri anyqtaldy.
«Qazir mártebesin zańdastyrý úshin sheteldiktiń ózi eshqaıda barýdyń nemese ishki ister organdaryna tikeleı júginýdiń qajeti joq. Sheteldikterdi qabyldaý týraly aqparattandyrý jónindegi mindetter bizdiń zańnamamen qabyldaýshy tulǵalarǵa (QR azamattaryna) júktelgen. Sheteldiktiń olarǵa kelgeni týraly habarlama úsh kún merzimde berilýi qajet. Ony eQonaq mobıldi qosymshasy, eGov saıty arqyly nemese kóshi-qon qyzmeti arqyly óte ońaı isteýge bolady», – dep atap ótti Jetisý oblysy PD KQQB.
