Bıyl Jetisaı aýdanynda 900 gektarǵa jýyq jerge qyryqqabat egiledi
TÚRKІSTAN. QazAqparat - Túrkistan oblysy, Jetisaı aýdanynda 900 gektarǵa jýyq jerge qyryqqabat egiledi. Qazirdiń ózinde jetisaılyq sharýalar 80 gektar egistikke erte pisetin qyryqqabat otyrǵyzyp úlgergen, dep habarlaıdy QazAqparat tilshisi.
Myrzashól óńirindegi birqatar qojalyqtardyń tynys-tirshiligimen tanysyp qaıtqan aýdan ákimi Jamantaı Beısenbaev Atameken eldimekenindegi qyryqqabat egip jatqan «Tazabaı» sharýashylyǵynda boldy. 
Búginde atalǵan qojalyq 5 gektar jerge 100 myń qyryqqabat kóshetin otyrǵyzýda. Egistik alqabynda 100-ge jýyq adam kóshet egip, olardyń árqaısysyna kúndigine 1500 teńgeden eńbekaqy tólenýde. Sharýa qojalyǵynyń múshesi Quttybek Shabaevtyń aıtýynsha, búgin egilgen qyryqqabat sáýir aıynyń alǵashqy 10 kúndiginde pisip jetiledi. Ol úshin aýa-raıy qolaıly bolýy qajet. 
Óndirilgen ónimniń basym bóligi kórshi Reseı naryǵyna jóneltiletin bolady. Atameken aýyldyq okrýginiń ákimi Erbolat Raevtyń aıtýynsha, bıyl dıqandar 250 gektar jerge qyryqqabat, 110 gektarǵa kókónis, 950 gektarǵa baqsha ónimderin otyrǵyzýdy josparlap otyr. Sol sııaqty Abaı aýyldyq okrýgindegi «Erkebaı» sharýa qojalyǵy 30 sottyq jerge jylyjaı ornatyp, búginde ondaǵy kóshetter sany 1 mln danadan asqan.
Jalpy aýdandaǵy jylyjaılardyń jumysymen tanysqan ákim jylyjaı kólemin ulǵaıtý maqsatynda memlekettik jeńildetilgen nesıe men kómekterdi alýǵa shaqyrdy.
«Aýdanymyzda bıyl 14 myń 900 gektarǵa baqsha ónimderi egiletin bolady. Naqtyraq aıtsaq, 9047 gektarǵa qaýyn, 5852 gektarǵa qarbyz egý josparlanýda. Onyń ishinde erte egiletin qaýyn kólemi 6300, qarbyz 4200 gektardy quraıdy. Sondyqtan dıqandardyń kóshetke degen suranysy kún sanap artyp otyr. Sondaı-aq barlyq aýyldyq okrýgterde kóshet ázirleýmen aınalysatyn qojalyqtardyń qatary da jyl sanap kóbeıip keledi», - dedi Jamantaı Beısenbaev.
