Bıyl jazda aýa raıy qandaı bolady - Qazgıdromet boljamy
NUR-SULTAN. QazAqparat - «Qazgıdromet» RMK Gıdrometortalyqtyń dırektory Marına Shmıdt jaz aılaryndaǵy aýa raıyna qatysty boljamymen bólisti, dep habarlaıdy QazAqparat tilshisi.
«Maýsymda termometrdiń synap baǵanasy klımattyq norma boıynsha ózgeredi. Qıyr batys jáne soltústik-batys aımaqtardan basqa jerde jaýyn-shashyn mólsheri ádettegi normadan kóp jaýady. Shilde aıy Qazaqstannyń basym bóliginde normaǵa jýyq bolmaq. Tek elimizdiń ońtústik-batys bóliginde aýa temperatýrasy 1°S-qa normadan joǵary bolýy múmkin. Jaýyn-shashyn elimizdiń basym bóliginde normadan az, elimizdiń shyǵys jartysynda - normaǵa jýyq, tek shyǵys jáne ońtústik-shyǵystyń taýly aımaqtarynda normadan kóp jaýady», - deıdi Marına Shmıdt OKQ-da ótken baspasóz máslıhatynda.
Onyń aıtýynsha, tamyz aıy bıyl jyly bolady.
«Kóptegen oblystarda aýa temperatýrasy 1°S normadan joǵary. Tek Qazaqstannyń soltústik-batys bóliginde normaǵa jýyq bolady. Jaýyn-shashyn normadan az jaýyp, tek soltústik jáne soltústik-batysta, ońtústik-shyǵys bóliktiń taýly jáne taý bókteri aımaqtarynda klımattyq normaǵa jýyq, tipti keı jerde kóp mólsherde jaýady dep boljanady», - deıdi ol.
Aldyn ala boljam boıynsha qyrkúıek, qazan aılary jyly bolmaq. Qazaqstannyń basym bóliginde normadan az jaýyn-shashyn mólsheri kútilip, qazaqstandyqtar «altyn kúzdiń» qyzyǵyn kórmek.
Eske sala ketsek, búgingi baspasóz máslıhatta «Qazgıdromet» RMK Aýa raıyn uzaq merzimge boljaý basqarmasynyń basshysy Juldyz Isabekova sáýirdiń eń sýyq kúnderi qaı kezde bolatynyn jarııalaǵan bolatyn.
