Bıyl jazda Astanadan Alakólge «Talgo» poıyzy qatynaıdy

ASTANA. QazAqparat – «Jolaýshylar tasymaly» aktsıonerlik qoǵamynyń bas dırektory Jánibek Taıjanov bıyl Alakólge baratyn týrısterge neshe poıyz qyzmet kórsetetinin aıtty, dep habarlaıdy QazAqparat tilshisi.

«Jazǵy kezeńge jolaýshy tasymaldaıtyn 1930 vagon daıyndap qoıdyq. Byıl jazda qosymsha 6 jazǵy marshrýt uıymdastyramyz. Negizgi baǵyttar, árıne, Alakóldegi kýrorttyq aımaqtardy damytý. Biz tıisti mınıstrliktermen, Kazakh Tourism jáne «Atameken» ulttyq kásipkerler palatasymen, sondaı-aq, týrıstik agenttiktermen birge týrıstik aımaqtardy damytý baǵytynda naqty jumys júrgizip kelemiz. Sonyń ishinde Alakól boıynsha jyl saıyn týrızm maýsymy bastalǵanǵa deıin jáne aıaqtalǵannan keıin keńes ótkizip, búkil bolǵan kemshilikter men talap-tilekterdi talqylaımyz», - dedi «Jolaýshylar tasymaly» AQ basshysy.

Kompanııa bıyl sol ótinishterdi eskerip Astanadan Alakólge júrdek poıyz shyǵarmaqshy.

«Byltyrǵy maýsym qorytyndysy boıynsha bizdiń týrıstik kompanııalar men jolaýshylar tarapynan Astana qalasynan Alakól baǵytynda «Talgo» poıyzy qatynasa degen tilek bolǵan. Bıyl biz sol tilekti oryndaımyz. Jazǵy kezeńde Astanadlat Alakólge «Talgo» poıyzy qatynaıdy. Jalpy Alakól baǵytynda 11 marshrýt josparlanǵan. Astanadan qatynaıtyn 3 marshrýttyń bireýi «Talgo» poıyzy bolady. Almatydan qatynaıtyn 5 marshrýttyń ekeýi «Talgo» poıyzy bolady. Shyǵys Qazaqstan oblysynan 2 poıyz, Abaı oblysynan 1 poıyz qatynaıdy», - dedi Jánibek Taıjanov.