Bıyl jaıaý júrginshilerdiń kinásinen 265 jol-kólik oqıǵasy bolǵan

NUR-SULTAN. QazAqparat – Bıyl elimizde 308 jaıaý júrginshi mert boldy. Bul týraly QR Іshki ister mınıstrligi Ákimshilik polıtsııa komıteti tóraǵasynyń mindetin atqarýshy Jandos Muratálıev málim etti, dep habarlaıdy QazAqparat tilshisi.

«Jol-kólik oqıǵasynda mert bolǵandardyń jáne jaraqat alǵandardyń tórtten bir bóligi jaıaý júrginshiler. Bıyl 308 jaıaý júrginshi kóz jumdy jáne 2 168-i jaraqat aldy», - dedi vedomstvo ókili.

Osy oraıda ol jaıaý júrginshiler jolda jaýapkershilik tanytýy tıis ekenin, joldaǵy qaýipsizdik jalpy alǵanda jaıaý júrginshige de, kólik júrgizýshisine de qatysty ekenin atap ótti.

«Sebebi baǵdarshamnyń qyzyl túsin elemeı júrgen nemese joldy belgilenbegen jerinen kesip ótken jaıaý júrginshi jol apatyna kináli bolyp jatady. Jaıaý júrginshilerdiń kesirinen 265 jol-kólik oqıǵasy tirkelip, onda 55 adam qaza bolyp, 217-si túrli jaraqat aldy», - dedi vedomstvo ókili.

Budan buryn habarlanǵandaı, 2022 jyly Qazaqstanda jol-kólik apattary kóbeıdi.