Bıyl jastardyń bastamalaryna 1,2 mln teńgeniń 10 myń granty beriledi

NUR-SULTAN. QazAqparat – 2030 jyly Qazaqstandaǵy jumysqa jaramdy turǵyndardyń 80%-y – 30-ǵa tolmaǵan jastar bolady. Bul týraly QR Premer-Mınıstri Álıhan Smaıylov Senat depýtatynyń saýalyna bergen jaýabynda málim etti, dep habarlaıdy QazAqparat tilshisi.

«Qazir jastardy jumysqa tartý Úkimettiń basty nazarynda. Ózińizge málim, 2000 jyldan bastap 300-400 myń bala dúnıege kelip, el demografııasy ońaldy. Qazir olardyń aldy eńbekke jaramdy jasqa jetti – jumys kúshiniń 60%-y, al 2030 jyly olardyń úlesi 80%-ǵa jetedi. Jastar úshin jyl saıyn 1 mıllıonǵa jýyq jumys orny ashylýǵa tıis», - dep jazylǵan jaýapta.

Úkimet basshysynyń aıtýynsha, azamattardy tabysty jumyspen qamtý úshin bastapqy teń jaǵdaılar jasalmaq. Ásirese, jastar úshin túrli tetikter qarastyrylyp jatyr. Olar:

1) Jyl saıyn 100 myńǵa jýyq jasty óndiris oryndaryna jumysqa ornalastyrý;

2) Jambyl oblysyndaǵy pılottyq jobanyń negizinde aýyl jastaryn kooperatıvter arqyly turǵylyqty mekeninde jappaı jumysqa tartý;

3) «Dılommen aýylǵa» jáne «Jastar praktıkasy» baǵdarlamalaryn qaıta qaraý arqyly óńirlerge jumysqa tartylǵan jastarǵa eńbekaqymen birge ústemaqy jáne dıfferentsıalanǵan áleýmettik paket usyný;

4) Jastardyń kásipkerlik bastamalaryn qoldaý úshin granttar bólý. Bıyl jastarǵa arnalǵan 10 myń grant qaralyp otyr, al onyń somasy 1,2 mln teńgege jetkizildi.

5) «Alǵashqy jumys orny» baǵdarlamasy aıasynda jumys berýshilermen birge mektep túlekterin jáne UBT tapsyrmaǵandardy jumyspen qamtý.

«Qaralyp otyrǵan sharalar jastardy jumyspen qamtý jáne jumysqa ornalastyrý problemalaryn sheshýge yqpal etedi», - dep jazady Álıhan Smaıylov.