Bıyl Jastardy qoldaý boıynsha memlekettik baǵdarlamany bekitý kerek - mınıstr

NUR-SULTAN. QazAqparat - Bıyl Jastardy qoldaý boıynsha memlekettik baǵdarlamany bekitý kerek. Bul týraly búgin QR Aqparat jáne qoǵamdyq damý mınıstrliginiń keńeıtilgen alqa otyrysynda vedomstvo basshysy Dáýren Abaev aıtty, dep habarlaıdy QazAqparat tilshisi.

«Jastar jyly» aıaqtaldy. Biraq jastar saıasaty boıynsha strategııalyq, zańnamalyq sııaqty júıeli sharalar jalǵasady. Bul bir jylda bitetin jumystar emes. Bıylǵy bizdiń mindetter: Birinshiden, 2030 jylǵa deıingi Qazaqstan Respýblıkasynyń jastar saıasaty tujyrymdamasyn jasaý; ekinshiden, Jastardy qoldaý boıynsha memlekettik baǵdarlamany bekitý. Bul qujatta qoljetimdi baspana berý, jumyspen jáne sapaly bilimmen qamtamasyz etý mehanızmderi qarastyrylady«, - dedi ol.

Dáýren Abaevtyń aıtýynsha, úshinshiden, Otbasylyq-genderlik saıasattyń 2030 jylǵa deıingi ekinshi satysyn júzege asyrýǵa kirisý qajet. Ol kópbalaly otbasylardy, jalǵyz basty ata-analardy qoldaý sharalaryn, krızıs ortalyqtardyń, áleýmettik qyzmetterdiń jumysyn jetildirýdi jáne basqalaryn qamtıdy. Tórtinshiden, memlekettik jastar saıasaty máseleleri boıynsha zań jobasyn ázirleý kerek.

»Bıyl biz EKSPO pavılony bazasynda ArtHUB qurý boıynsha barlyq máselelerdi pysyqtaýymyz kerek. Bul shyǵarmashylyq jastarǵa arnalǵan biregeı zamanaýı alań bolady. Ol jerde jastar ózderiniń jobalary men bastamalaryn júzege asyrady. Oǵan qosa, mynadaı is-sharalardy ótkizý josparlanýda: «Zeren» jazǵy tanymdyq lageri; V Respýblıkalyq ákeler forýmy jáne Halyqaralyq saraptamalyq forýmy; Qazaqstan men Reseıdiń volonterlik keńesi. Osy salalarǵa jetekshilik etetin vıtse-mınıstr Ospanqulov Ǵabıdýlla Abdýllaulyna jastar saıasaty aıasyndaǵy josparlanǵan sharalardy oryndaýdy tapsyramyn«, - dedi mınıstr.