Bıyl «Jas ulan» mektebin 75 tárbıelenýshi bitiredi (FOTO)

ASTANA. QazAqparat - Kezekti oqý jyly aıaqtalýǵa jaqyn. Bıyl Halyq qaharmany, armııa generaly Saǵadat Nurmaǵambetov atyndaǵy «Jas ulan» respýblıkalyq mektebin 75 tárbıelenýshi bitiredi. Bul týraly QR Qorǵanys mınıstrliginiń baspasóz qyzmetinen habarlady.

Oqýdy bitirýshi ulandyqtardyń aldynda eki mańyzdy mindet tur. Bul - biryńǵaı ulttyq test tapsyrý jáne mamandyq tańdaý. Mektepte oqýshylardyń UBT-ǵa daıarlyq deńgeıi aıyna 3-4 ret tekserilip, synaq testileý tapsyrady. Sonymen birge bitirýshiler arasynda mamandyqqa baǵyttaý jumystary júrgizilýde. Statıstıka boıynsha «Jas ulan» túlekteriniń shamamen 90-95% áskerı maman bolýdy tańdaıdy. Áskerı tártip, dene jáne jaýyngerlik daıarlyq, sap túzeý, tártiptilik jáne jınaqylyq - barlyǵy ulandyqtardy azamattyq mektep oqýshylarynan ereksheligin kórsetip qana qoımaı, áskerı oqý ornyna túsýge septigin tıgizedi. Óz ómirlerin áskerı qyzmetpen baılanystyrǵysy keletin balalar «Jas ulan» mektebinde tálim-tárbıe alady.

Qazir atalǵan mektepte 449 ulan bilim alýda. Ótken jyly mektepti 67 ulan bitirip shyqty. Búginde olar Qurlyq áskerleriniń áskerı ınstıtýtynda, eki márte Keńes Odaǵynyń batyry Talǵat Begeldınov atyndaǵy Áýe qorǵanysy kúshteriniń áskerı ınstıtýtynda, Radıoelektronıka jáne baılanys áskerı ınstıtýtynda, QR UQK, TJM jáne ІІM joǵarǵy oqý oryndarynda, sondaı-aq Reseı, Belarýs jáne Qytaı elderiniń Qorǵanys mınıstriligine qarasty joǵarǵy áskerı oqý oryndarynda bilim alýda.