Bıyl jańartylatyn energııa kózderiniń qýaty 460 MVt-qa jetedi - Qanat Bozymbaev

ASTANA. QazAqparat - Bıyl jańartylatyn energııa kózderiniń qýaty 460 MVt-qa jetedi. Bul týraly búgin Global Challenges Summit 2018 forýmy aıasynda ótken Halyqaralyq jasyl tehnologııalar jáne ınvestıtsııalyq jobalar ortalyǵynyń tusaýkeser sharasynda QR Energetıka mınıstri Qanat Bozymbaev aıtty, dep habarlaıdy QazAqparat.

«Kóptegen elder úshin «jasyl ekonomıka» memlekettiń ekonomıkasynyń ósýine jáne azamattardyń ál-aýqatyn arttyrýdyń draıverine aınaldy. «Jasyl ekonomıkaǵa» kóshý tujyrymdamasyn iske asyrý jyldarynda resýrstardy únemdeıtin taza tehnologııalardy paıdalaný qalalarda ortalyqtandyrylǵan sýmen jabdyqtaýǵa qoljetimdilikti 94 paıyzǵa jáne aýyldyq jerlerde 57 paıyzǵa jaqsartýǵa múmkindik bergenine kózimiz jetti. Aýyl sharýashylyǵyndaǵy eńbek ónimdiligi eki ese ósti. Qazirgi zamanǵa laıyqty energııa únemdeý júıesiniń negizi quryldy. Aǵymdaǵy jyldyń sońyna qaraı jańartylatyn energııa kózderiniń qýaty shamamen 460 MVt bolady dep kútilýde. Qoldanystaǵy kómir elektr stansalarynda zamanaýı kúldi óńdeý qurylǵylaryn engizý jumystary jalǵasýda. Qaldyqtardy óńdeý jáne qaıta óńdeý 31 paıyzǵa jetti», - dedi Qanat Bozymbaev.

Onyń aıtýynsha, joǵaryda atalǵan nátıjelerge óndiris pen tutyný salalaryna jasyl ekonomıka ustanymdaryn engizý boıynsha júıeli jumystardyń jáne sheteldik seriktestermen konstrýktıvti jumystardyń arqasynda qol jetkizilip otyr.

«Jasyl tehnologııalar jáne ınvestıtsııalyq jobalar halyqaralyq ortalyǵynyń qurylýynyń arqasynda bul protsestiń keńeıe túserine senim artamyz. Premer-Mınıstr atap ótkendeı, ortalyq bizdiń elimizde jáne tolyqtaı alǵanda Ortalyq Azııada jańa tehnologııalardy paıdalanýdyń katalızatoryna aınalýy tıis. Qazaqstan jańa tehnologııalyq sheshimderdi izdeýge jáne ınvestıtsııa tartýǵa múddelik tanytatyndyǵyn atap ótkim keledi», - dedi Qanat Bozymbaev.