Bıyl jańa Sý kodeksiniń tujyrymdamasy ázirlenedi
NUR-SULTAN. QazAqparat – Jańa Sý kodeksiniń tujyrymdamasy osy jyldyń sońyna deıin bekitiledi. Bul týraly Ekologııa, geologııa jáne tabıǵı resýrstar mınıstrliginiń alqa májilisinde osy vedomstvonyń vıtse-mınıstri Serik Qojanııazov málim etti, dep habarlaıdy QazAqparat tilshisi.
«Aldymyzda turǵan aýqymdy jumys sý salasyndaǵy zańnamany jetildirýge qatysty. Qoldanystaǵy Sý kodeksi 2003 jyly qabyldanǵan. Osyǵan taldaý jasadyq, sodan beri kodeks 63 paıyzǵa deıin ózgertýler men tolyqtyrýǵa ushyraǵan», - dedi S. Qojanııazov.
Onyń aıtýynsha, qoldanystaǵy kodeks sýdy sharýashylyq maqsatynda paıdalanýǵa baǵyttalǵan.
«Jańa Sý kodeksi eldiń sý resýrstary áleýetin saqtaý, sýǵa degen suranysty basqarý baǵyttaryn kúsheıtýi tıis. Jańa qujattyń tujyrymdamasy osy jyldyń sońyna deıin ázirlenedi», - dedi vıtse-mınıstr.
