Bıyl Jambylda 65 medıtsınalyq nysan paıdalanýǵa beriledi
TARAZ. QazAqparat – Jambyl oblysynda bıyl 65 alǵashqy medıtsınalyq-sanıtarlyq kómek kórsetý nysany paıdalanýǵa beriledi, dep habarlaıdy QazAqparat tilshisi.
Jambyl oblysynda alǵashqy medıtsına-sanıtarlyq kómek kórsetý nysandarynyń tapshylyǵy joıylýda. Bul másele oblys ákiminiń tapsyrmasyna oraı bıyl tolyǵymen sheshimin tappaq. Ótken jyly memlekettik-jekemenshik áriptestik aıasynda onyń 30-y salynsa, bıyl 65 nysan el ıgiligine paıdalanýǵa beriledi.
«Jalpy byltyr júrgizilgen zerdeleý sharalarynyń nátıjesinde óńirde osyndaı 95 nysannyń qajet ekeni anyqtalǵan. Aımaq basshysy bul tapshylyqty jedel sheshýdi tapsyryp, olardyń qurylysyn memlekettik-jekemenshik áriptestik aıasynda salý qolǵa alyndy. Aıta keteıik, 95 nysannyń alǵashqy quny - 6 mıllıard 200 mıllıon teńge bolsa, ońtaılandyrý arqyly 2 mıllıard 400 mln teńgege, demek 3 ese arzandatyldy. Buryndary ár jyly osyndaı 10 nysan ǵana salynatyn. Bul oraıda bıýdjet qarjysyn únemdeýden bólek, atalǵan kúrdeli másele nebári 2 jylda sheshilip otyr»,-deıdi oblystyq densaýlyq saqtaý basqarmasynyń basshysy Marat Jumanqulov.
Sondaı-aq, basqarma basshysy bul baǵytta merdigerlerler jaýakershiligi kúsheıtilip, kepildik merzimi 3 jyldan 5 jylǵa deıin ulǵaıǵanyn, aıyppul mólsheri 4 ese kóbeıgenin jetkizdi.
Sonymen birge, ótken jyly 200 tósektik oblystyq onkologııalyq dıspanser ǵımaratynyń qurylysy bastaldy. Saladaǵy qurylys jumystarynyń jalpy quny - 13,9 mıllıard teńge.
