Bıyl Jambyl oblysynda oqýshy zorlyǵyna qatysty 8 derek tirkelgen

TARAZ. QazAqparat – Jambyl oblysynda 10 aıda kámeletke tolmaǵan jasóspirimderge qatysty 138 qylmystyq is tirkelgen, dep habarlaıdy QazAqparat tilshisi.

Naqtyraq aıtsaq, óńirde jyl basynan beri oqýshy zorlyǵyna qatysty - 8, jynystyq sıpattaǵy zorlyq-zombylyqtyń - 5, 16 jasqa tolmaǵandarmen jynystyq qatynasqa túsýdiń - 17 deregi jáne taǵy da basqa qylmystar anyqtalǵan. Bul týraly óńirlik kommýnıkatsııalar qyzmetinde ótken brıfıngte aıtyldy.

Atalǵan brıfıngte Jambyl oblysy aýmaǵynda 9 qarashada bastalǵan «Zorlyq-zombylyqsyz jáne qatigezdiksiz balalyq shaq» respýblıkalyq aqparat naýqanynyń barysy baıandaldy.

Oblystyq bilim basqarmasy basshysynyń orynbasary Talǵat Jamalov Balalar quqyqyǵyn qorǵaý komıtetiniń uıymdastyrýymen ótetin naýqan 20 qarashaǵa deıin sozylatynyn jetkizdi.

Shara balalarǵa qatysty qatigezdik qarym-qatynasqa qoǵam nazaryn burý, balalar ómirine beıjaı qaramaý maqsatyna negizdelgen.

Aqparattyq naýqan aıasynda aımaqta 15-ke jýyq túrli is-shara ótpek. Onyń qatarynda túngi reıdten bastap onlaın-semınar men esse jazý, fotokonkýrs sekildi sharapatty sharalar uıymdastyrylady.

«Bıyl kámeletke tolmaǵandarǵa jasalatyn qylmystyń aldyn alý maqsatynda prokýratýra, bilim jáne densaýlyq saqtaý organdary 2 myńǵa jýyq birlesken reıd júrgizdi. Onyń 1400-i mektep mańynda ótti. Nátıjesinde 5400-den astam ákimshilik quqyq buzý faktisi anyqtaldy. Onyń 3 myńǵa jýyǵy kámeletke tolmaǵandardyń túngi ýaqytta tysta júrýine qatysty bolyp otyr»,-dedi Talǵat Jamalov.