Bıyl Jambyl oblysynda myńǵa jýyq adam qutqarylǵan
TARAZ. QazAqparat - Jambyl oblysy tótenshe jaǵdaılar departamenti jyldyń qorytyndysyn shyǵarýda, dep habarlaıdy «QazAqparat» HAA tilshisi oblystyq TJD baspasóz qyzmetine silteme jasap.
Málimetterge qaraǵanda, 11 aıda azamattarǵa kómek berý úshin qyzmetkerler tórt myńnan astam ret saparǵa shyqqan, 947 adam qutqarylyp, 1 myńnan astam adam tótenshe jaǵdaılar aımaǵynan qaýipsiz jerge kóshirilgen, 67 zardap shegýshige alǵashqy medıtsınalyq kómek kórsetilgen. Júrgizilgen jedel jumystardyń nátıjesinde bıylǵy jyly zardap shekkender men qurban bolǵandar sany, sondaı-aq tabıǵı jáne tehnogendik sıpattaǵy tótenshe jaǵdaılardan keletin zalaldyń kólemi qysqardy.
Qutqarýshylardyń aıtýynsha, tehnogendik sıpattaǵy tótenshe jaǵdaılardyń 98%-yna turmystyq jáne óndiristik órt sebep bolady.
Jambyl oblysy tótenshe jaǵdaılar departamentindegiler apattyq-qutqarý bólimsheleriniń materıaldyq-tehnıkalyq jabdyqtalýy jyl saıyn jaqsaryp kele jatqanyn aıtady. Bul, óz kezeginde, qutqarý jumystarynyń jyldamdyǵy men tıimdiligin arttyra túsedi. Bul rette jergilikti atqarýshy bılik organdary aıtarlyqtaı kómek kórsetip otyr.
Jambyl oblystyq ákimdiginiń baspasóz qyzmetiniń málimdeýinshe, Táýelsizdik kúni qarsańynda oblys tótenshe jaǵdaılar departamentine jergilikti bıýdjet qarajattary esebinen alynǵan apattyq-qutqarý qondyrǵylary men úsh avtomobıl berildi. Olardy tapsyrý rásimi Jambyl oblysy tótenshe jaǵdaılar departamentiniń №15 órt-qutqarý bóliminde ótkizildi.
«Munda azamattyq qorǵanys júıesiniń apattar, oqys oqıǵalar kezindegi daıyndyq deńgeıin kórý úshin jınaldyq. Azamattardyń qaýipsizdigin qamtamasyz etý, olardyń menshigin qorǵaý, tabıǵı jáne tehnogendik sıpattaǵy tótenshe jaǵdaılar týraly eskertý jáne olardyń aldyn alý - Jambyl oblysy azamattyq qorǵanys memlekettik júıesi qyzmetiniń basty baǵyttary. Onyń oryndalýyn óńir basshylyǵy únemi baqylap otyrady», - dedi oblys ákiminiń orynbasary Bekbolat Orynbekov.
Bekbolat Orynbekov sońǵy tótenshe jaǵdaılar departamentine apattyq-qutqarý qondyrǵylary jáne basqa da múlikter alý úshin tórt jylda jergilikti bıýdjetten 330 mln teńge bólingenin atap kórsetti.
