Bıyl Jambyl oblysynda 677 órt oqıǵasy tirkelgen

TARAZ. QazAqparat -   Jambyl oblysynda  jyl basynan beri 677 órt oqıǵasy tirkelip, odan kelgen shyǵyn 142 mln 795 myń teńgeni qurady. Órt kezinde 12 adam qaza bolsa,  9 adam ártúrli dárejede kúıik alǵan,  dep habarlaıdy QazAqparat.

Bul týraly jergilikti BAQ ókilderimen ótken brıfıngte  oblystyq  tótenshe jaǵdaılar departamenti bastyǵynyń orynbasary Talǵat Sabırov, Órt qaýipsizdigi salasyndaǵy baqylaý jáne profılaktıkalyq qyzmet basqarmasynyń  bastyǵy Maqsat Ákimbaev málimdedi.

«Jalpy, órt sany qysqy merzimde birshama kóbeıip ketedi. Turǵyndardyń basym kópshiligi qysta jylytý peshin qoldanady, biraq keı azamattar jylytý peshteri men murjalardy paıdalaný kezinde órt qaýipsizdigi talaptaryn saqtamaı, ózderiniń baspanasyna, óz ómiri men týystarynyń ómirine qaýip tóndiredi. ıAǵnı, bıyl oblys aýmaǵynda 22 ýly gazben  ýlaný oqıǵasy tirkeldi jáne 44 adam ýlandy, onyń ishinde 9 adam qaza boldy. Aıta keteıik, jyl saıyn turmystyq órtterdi aldyn alý maqsatynda jylytý maýsymy kezinde oblystyq TJ departamenti qyzmetkerlerimen órt qaýipsizdigi aılyǵyn júrgizedi, turǵyn úılerdi aralap turǵyndarǵa órt qaýipsizdigi talaptaryn túsindiredi jáne órtke qarsy taqyryptarǵa jadnamalar taratady»- dedi Talǵat Sabırov.

Sondaı-aq, spıkerler jańa jyl merekesi kezinde órt qaýipsizdigi erejelerin saqtaý jáne sertıfıkattalmaǵan pırotehnıkalyq buıymdardy qoldanýǵa jol bermeý jóninde de aıtyp ótti.

«Sońǵy jyldary otshashýlar, jarylǵysh jáne taǵy basqa pırotehnıkalyq zattardy qoldanýdan shyqqan órtter jıi tirkelip otyr. Qaýipti oıynshyqtarmen oınap, nátıjesinde balalar ártúrli dárejedegi kúıik, jaraqat alǵan órt faktileri alańdatady. Mysaly, sońǵy eki jyl ishinde emdeý uıymdaryna jarylǵysh paketterdi qoldaný saldarynan ártúrli termııalyq kúıik alǵan 15-ten astam adam túsken, onyń basym kópshiligi - 9 jastan 12 jasqa deıingi jasóspirimder», - deıdi M.Ákimbaev.

Aıta ketý kerek, jańa jyl merkekesi qarsańynda pırotehnıklyq ónimder kóptep satyla bastaıtyny belgili. Olardyń deni sertıfıkattalmaǵan jáne arnaıy belgilenbegen jerlerde satylatyny jasyryn emes. Ol zattardy qoldaný ártúrli dárejeli termııalyq jaraqattar alý, al keıbir jaǵdaılarda órttiń paıda bolý qaýpin týdyrady.

Mamandardyń aıtýynsha, erejelerge sáıkes, azamattyq pırotehnıkalyq zattar ishki ister organdarynda tirkelgen qoımalarda saqtalýy tıis. Pırotehnıkalyq ónimderdi 14 jasqa tolmaǵan balalarǵa satýǵa tyıym salynady.

 

Ǵıbrat Sembaı