Bıyl Jambyl oblysy 700 tonna et eksporttamaq
ASTANA. QazAqparat - Bıyl Jambyl oblysy 700 tonna et eksportqa shyǵarmaq. Bul týraly búgin Ortalyq kommýnıkatsııalar qyzmetindegi brıfıngte Jambyl oblysynyń ákimi Kárim Kókirekbaev málim etti, dep habarlaıdy QazAqparat.
«Oblysta mal sany ósýde. Bizdiń ózimizdi etpen qamtamasyz etýge jáne eksportqa shyǵarýǵa jaǵdaıymyz bar. Sondyqtan et ónimderin qaıta óńdeıtin «Merki et», «Ońtústik halal taǵamdary» jáne «Áýlıe ata Fenıks» qus fabrıkasy sııaqty kásiporyndar iske qosyldy. Ótken jyly shet memleketterge 451 tonna et eksporttaldy. Bıyl ony 700 tonnaǵa jetkizemiz», - dedi Kárim Kókirekbaev.
Onyń dereginshe, 2017 jyldyń 8 aıynda oblystyń agroónerkásip kesheni salasynda óndirilgen ónimniń jalpy kólemi 104,6 mlrd. teńgeni qurap otyr. Jalpy, aýyl sharýashylyǵyn damytý maqsatynda Jambyl oblysyna 15,8 mlrd teńge, onyń ishinde respýblıkalyq bıýdjetten 6,3 mlrd jáne oblystyq bıýdjetten 9,5 mlrd teńge bólingen.
«Et klasterin odan ári damytý úshin Moıynqum, Merki aýdandarynda reseılik «Agrofırma Túrikpen» jáne malaızııalyq «Agrostan Ferms» seriktestikteri árqaısysy 3 myńnan 5 myń basqa deıin arnalǵan iri qara mal bordaqylaıtyn keshender soǵýda», - dedi oblys basshysy.
