Bıyl jalpy sıpattaǵy transfertterdi esepteýdiń jańa ádistemesi ázirlenedi - Erulan Jamaýbaev

NUR-SULTAN. QazAqparat – Bıylǵy jyldyń 5 aıynda jergilikti bıýdjetterdiń kiristeri 29 paıyzǵa artyǵymen oryndalyp otyr. Bul týraly Parlament palatalarynyń birlesken otyrysynda Qarjy mınıstri Erulan Jamaýbaev málim etti, dep habarlaıdy QazAqparat tilshisi.

«Bıýdjetaralyq qatynastardy jetildirý máselesine qatysty kelesini atap ótkim keledi. Qoldanystaǵy jalpy sıpattaǵy ózgermeıtin transfertterdi 3 jylǵa qoldaný ádistemesi ýnıtarlyq memleketterge tán. Bul óńirlerge qosymsha alynǵan kiristerdi ózderine paıdalanýǵa múmkindik beredi. Mysaly, 2017-2019 jyldary jergilikti bıýdjetter 1 trln teńgege jýyq asyra oryndalyp, ol óńirlerdiń ózderinde qalǵan bolatyn», - dedi E. Jamaýbaev Úkimet pen Esep komıtetiniń 2020 jylǵa arnalǵan respýblıkalyq bıýdjettiń atqarylýy týraly esepterin qaraý kezinde.

Onyń aıtýynsha, ótken jyldan bastap jergilikti bıýdjetterdiń derbestigin arttyrý úshin shaǵyn jáne orta bıznesten túsetin korporatıvtik tabys salyǵy olardyń shyǵystar bazasyna berildi.

«Bul jaqsy sheshim boldy. 2020 jyly shaǵyn jáne orta bıznesten korporatıvtik tabys salyǵy boıynsha jospar 25 paıyzǵa asyra oryndaldy. Bıyljy jyldyń 5 aıynda jergilikti bıýdjetterdiń menshikti kiristeri 29 paıyzǵa nemese 367 mlrd teńgege artyǵymen oryndalyp otyr», - dedi mınıstr.

«Bıyl Jalpy sıpattaǵy transfertterdi esepteýdiń jańa ádistemesi ázirlenetin bolady. Onda barlyq is júzinde qalyptasqan shyǵystar, onyń ishinde ınfraqurylymnyń, joldardyń jáne turǵyn úı-kommýnaldyq sharýashylyǵynyń aǵymdaǵy jaı-kúıi eskeriletin bolady. Sondaı-aq, jańadan iske qosylatyn obektilerdi kútip ustaý boıynsha qarajat eskerilmek. Barlyq kórsetkishter men koeffıtsıentter qaıta qaralady», - dedi ol.