Bıyl jalǵan terrorıster 140 ǵımaratqa «bomba qoıyp» shyqty

NUR-SULTAN. QazAqparat - Jyl basynan beri polıtsııa qyzmetkerleri jasyrylǵan bomba týraly habarlardy tekserýge 140 márte shyqqan, dep habarlaıdy QazAqparat.

Іshki ister mınıstrliginiń málimetinshe, terrorızm aktisi týraly jalǵan habarlama negizinde 101 qylmystyq is qozǵalǵan.

Jalǵan terrorısterdiń qol suǵý obektileri:

- bilim obektileri;

- kólik obektileri;

- saýda, oıyn-saýyq ortalyqtary;

- elshilikter;

- bankter jáne basqalar.

Ótken jylmen salystyrǵanda mundaı habarlama boıynsha 68%-ǵa kóp qylmystyq is qozǵaldy.

101 istiń tek 12-sinde ǵana qylmys quramynyń bolmaýyna baılanysty is toqtatyldy.

Jyl basynan beri ǵımarattarǵa «mına qoıǵany» úshin 11 adam sottaldy, onyń altaýy bas bostandyǵynan aıyryldy.

Keı jaǵdaıda «bombalaýshylar» shetelden bolyp keledi.

Sheteldik seriktesterden málimetterdi QR Bas prokýratýrasy arqyly alýyna qaraı shet elderdiń quqyq qorǵaý organdaryna halyqaralyq tergeý tapsyrmasy beriledi.

Mundaı tapsyrmalar Reseı, Shveıtsarııa, Malaızııa jáne Ýkraınaǵa jiberildi.