Bıyl jalaqy bereshegi bar kásiporyndarǵa 136 mln teńge aıyppul salyndy
NUR-SULTAN. QazAqparat – Jyl basynan beri jalaqy bereshegine jol bergen kásiporyn basshylaryna 136 mıllıon teńge aıyppul salynǵan. Úkimet otyrysynda Eńbek jáne halyqty áleýmettik qorǵaý mınıstri Birjan Nurymbetov osylaı málimdedi, dep habarlaıdy QazAqparat tilshisi.
«Sońǵy úsh jylda jalaqy bereshegin óteý boıynsha oń úrdis baıqalýda. Atap aıtqanda, 2018 jyldyń basymen salystyrǵanda jalaqy bereshegi 34 paıyzǵa nemese 744 mıllıon teńgege, jyl basynan beri 560 mln teńgege tómendep, qazirgi tańda 1 mlrd 420 mln teńgeni qurady. Bereshektiń basym bóligi Nur-Sultan jáne Almaty qalasyna, Aqtóbe oblysyna tıesili», - dedi Birjan Nurymbetov Úkimet otyrysynda.
Mınıstrdiń aıtýyna qaraǵanda, jyl basynan beri bereshekke jol bergen kásiporyndar basshylaryna 1 200 uıǵarym berilip, 136 mıllıon teńge aıyppul salynǵan.
«Qabyldanǵan sharalardyń arqasynda 36 myńdaı jumysshynyń quqyǵy qorǵalyp, 5 mlrd teńgeniń aǵymdaǵy bereshegi óteldi. Sharalardy kúsheıtý maqsatynda búgingi tańda eńbek ınspektorlarynyń uıǵarymyn sot organdarynyń atqarý qujattar tizbesine engizý jáne jumys berýshilerdiń jalaqy tólemegeni úshin ákimshilik jaýapkershilikti kúsheıtý máselesi sheshilýde», - dedi ol.
Eske sala ketsek, Úkimet basshysy jalaqyny bermeı qalý jumys berýshi úshin tıimsiz bolatyndaı etip zańnama normalaryn kúsheıtýdi tapsyrdy.
