Bıyl Zerendi men Býrabaı arasynda jańa jol paıdalanýǵa beriledi
NUR-SULTAN. QazAqparat - «Şýchınsk-Zerendi» avtojolyn qaıta jańartý jumystary 2019 jyly aıaqtalady. Bul týraly QR IIDM baspasóz qyzmetinen málim boldy, dep habarlaıdy QazAqparat.
Şýchınsk-Zerendi» avtojoly eki kýrorttyq aımaqty, sondaı-aq turǵyndar tyǵyz shoǵyrlanǵan Zlatopole, Savınka, Vedenovka, M.Ǵabdýllın, Serafımovka jáne basqa da aýyldardy baılanystyratyn kúre jol.
«Jalpy uzyndyǵy 80 shaqyrym quraıtyn kólik jolyna qaıta jóndeý jumystary júrgizilýde. Bas merdiger jobaǵa sáıkes jol boıyna 63 sý ótkizý qubyryn, eki demalys alańyn,4 avtobýs pavılonyn, 15 shaqyrym qar ustaıtyn qorshaýlar men 14 shaqyrym tosqaýyl qorshaýlaryn ornatýy tıis. Sonymen qatar, Zerendi kentindegi baǵdarsham qıylystaryn jáne M.Ǵabdýllın, Serafımovka aýyldarynyń janynan ótetin avtojoldyń boıyn jaryqtandyrýy kerek. Osy joba aıasynda Zerendi kentindegi DEÝ-73 (jolǵa qyzmet kórsetý kesheni) jáne Şýchınsk qalasyndaǵy DEÝ-5 qaıta qurý qarastyrylǵan», - delingen vedomstvo málemetinde.
Qaıta jańartý jumystary aıasynda «Şýchınsk-Zerendi» baǵytyndaǵy jol II-shi jáne III-shi tehnıkalyq sanattaǵy asfalt-betondy eki jolaqty avtojol bolady.
«Qazirgi tańda jol-qurylys materıaldary tolyq kólemde daıyn. Búginde jer tósemderin keptirý, jol jıekterin aınalma jolǵa sáıkes keltirip,aınalma joldy salý úshin tasqyn sýlardy burý boıynsha jumystar júrip jatyr. Jobany 2019 jyly tolyq aıaqtaý josparlanǵan», - dep atap ótilgen habarlamada.
