Bıyl úıirli shegirtke 640,8 myń gektarǵa taraldy - AShM
«Shegirtke jáne karantındik zııankesterge qarsy kúres, egistikterdi asa qaýipti zııandy organızmderden qorǵaý jónindegi aǵymdaǵy jaǵdaıdy habardar eteıin. Respýblıka aýmaǵynda erekshe qaýipti organızmderdiń 11 túri, zııandy organızmderdiń 5 túri jáne karantındik obektilerdiń 14 túri taralǵan. Shegirtkelermen kúresýge erekshe kóńil bólinedi. Bıyl úıirli shegirtkeler 640,8 myń gektar alańda taralǵan, onyń ishinde ıtalıandyq prýs - 384,7 myń gektar, azııalyq shegirtke – 142,0 myń gektar jáne marokko shegirtkesi – 114,1 myń gektarǵa taraldy. Sonymen qatar, saıaq shegirtke zııankesteri 239 myń gektar alańda taralǵan», - dedi A. Marsuly Ortalyq kommýnıkatsııalar qyzmetinde.
Onyń aıtýynsha, jalpy shegirtkelerge qarsy kúreske respýblıkalyq jáne jergilikti bıýdjetterden 2,4 mlrd teńge bólindi. Qarjy pestıtsıd pen hımııalyq óńdeý boıynsha qyzmetterdi barlyq boljanǵan alańǵa satyp alýǵa múmkindik berdi.
«Úıirli shegirtkelerge qarsy tıimdi óńdeý júrgizý úshin pestıtsıdterdiń ártúrli toptaryndaǵy preparattary satyp alyndy.
Oblys ákimdikterimen birlesip, óńirlerde oblys ákimderiniń orynbasarlary basqaratyn jedel shtabtar quryldy jáne monıtorıngpen hımııalyq óńdeý jumystardy uıymdastyrý jumys josparlary bekitildi. Úıirli shegirtke zııankesteriniń oshaqtaryn anyqtaý úshin GPS navıgatorlardy, GPS trekerlerdi, planshetterdi paıdalana otyryp jáne 524 avtokólik pen 1 230 tekserýshi tartylyp, 38,4 mln ga tekseriledi», - dedi komıtet tóraǵasy.
Onyń sózine qaraǵanda, úıirli shegirtkelerge qarsy hımııalyq óńdeý júrgizýge 148 arnaıy búrikkish tehnıka tartyldy. Shegirtkelerdiń QHR, Reseı, Ózbekstan sekildi kórshiles memleketterdiń aýmaǵynan shekaralas aýmaqtaryna kóshýin boldyrmaý úshin shegirtkeler zııankesterin anyqtaý maqsatynda birlesken zertteýler júrgizildi.
«Jalpy, ýaqtyly júrgizilgen fıtosanıtarııalyq is-sharalardyń arqasynda shegirtkelerdiń taralý alańyn 2018 jylǵy 1,7 mln gektardan 2021 jyly 640,8 myń gektarǵa deıin qysqartýǵa qol jetkizildi», - dedi Almabek Marsuly.