Bıyl uıaly baılanys qyzmetterine tarıfter tómendemeıdi

ASTANA. QazAqparat - Bıyl uıaly baılanys qyzmetterine jáne ınternetke tarıfterdi tómendetý josparlanyp otyrǵan joq. Bul týraly QazAqparattyń resmı saýalyna QR Aqparat jáne kommýnıkatsııalar mınıstrliginiń baspasóz qyzmetinen habarlandy.

Osy rette vedomstvo «Baılanys týraly» 2004 jylǵy 5 shildedegi № 567 Qazaqstan Respýblıkasy zańynyń 20-babynyń 1-tarmaǵyna sáıkes, eger Qazaqstan Respýblıkasynyń zańdarynda ózgeshe sharalar kózdelmese, baılanys operatorlary baılanys qyzmetterine arnalǵan tarıfterdi negizdelgen shyǵyndardy negizge ala otyryp derbes belgileıtinin atap ótýde.

«Qazaqstan Respýblıkasy Investıtsııalar jáne damý mınıstriniń m.a. 2015 jylǵy 24 aqpandaǵy №171 buıryǵymen bekitilgen Baılanys qyzmetterin kórsetý qaǵıdalarynyń 26-tarmaǵyna sáıkes, uıaly baılanys operatory abonentterge usynatyn tarıftik josparlardy qalyptastyrady. Tarıftik josparlar tizbesi, olardy paıdalaný sharttary (olardyń qoldaný merzimi nemese basqa da shekteýler), olarǵa engizilgen uıaly baılanys qyzmetterin jáne olarǵa tarıfterdi uıaly baılanys operatory anyqtaıdy. Osylaısha, qazirgi ýaqytta memleket uıaly baılanystyń basym operatorlary tarıfteriniń shekti deńgeıin retteıdi, al tarıftik josparlar men olardyń sharttaryn olar ózderi naryq konıýnktýrasyna súıene otyryp, derbes qalyptastyrady»,-delingen mınıstrlik málimetinde.