Bıyl ýtılızatsııaǵa qansha kólik qabyldanady
ASTANA. QazAqparat - Búgin eski kólikterdi ýtılızatsııalaýǵa arnalǵan baǵdarlamanyń kezekti kezeńi bastaldy. Alaıda úsh qalada ótken jyldyń kvotasy tolyǵymen ıgerilgendikten, eski kólikterdi qabyldaý sharalary sál keıinge shegerildi, dep xabarlaıdy QazAqparat tilshisi baǵdarlamanyń operatoryna silteme jasap.
Ótken jyly ýtılızatsııalaý baǵdarlamasyna 10 myń kvota bólingen bolatyn. Sonyń 5 665-si ıgerildi. Aqtóbe, Qostanaı men Oral qalalarynda kvota tolyǵymen ıgerildi. Sondyqtan atalǵan qalalarda eski kólikterdi qabyldaý naýqanyn qańtardyń 25-si kúni bastaý josparlanyp otyr. Al kvota ıgerilmegen basqa aımaqtarda búginnen bastap ýtılızatsııalaý baǵdarlasy qaıta jandandy. Jalpy, aǵymdaǵy jylda ótken jyldyń kvotasynyń ústine 40 myń kvota qosylady.
Búginde eski kólikterdi qabyldaý baǵdarlamasy aıasynda elektrondy kezekke turý qyzmetiniń engizilgenin atap ótken jón. Kezekke 8 800 080 08 65 arqyly, ıa bolmasa, auto.recycle.kz saıtyndaǵy arnaıy ótinish toltyrý arqyly turýǵa bolady.
Aıta keteıik, baǵdarlama aıasynda 3,5 tonnadan aspaıtyn jeńil kólikter qabyldanady. Al ýtılızatsııalyq tólemniń kólemi avtomobıldiń texnıkalyq jaǵdaıyna qaraı belgilenedi. Tolyq jıyntyǵyna 150 000 teńge berilse, isten shyqqan kólikter úshin 48 000 teńge tólenedi.
Aǵymdaǵy jyly maýsymda ýtılızatsııalaýǵa júk kólikterin qabyldaý bastalady.
