Bıyl urlanǵan maldyń jartysynan astamy tabyldy

NUR-SULTAN. QazAqparat – Bıyl elimizde mal urlyǵy 17 paıyzǵa tómendedi. Bul týraly QR ІІM Krımınaldyq polıtsııa departamentiniń asa mańyzdy ister jónindegi aǵa jedel ýákili Qudııar Nurseıitov aıtty, dep habarlaıdy QazAqparat tilshisi.

«Qabyldanǵan is-sharalar nátıjesinde qylmystyń osy túrin tómendetýdiń turaqty úrdisine qol jetkenin atap ótken jón. Bıyl onyń sany 17 paıyzǵa tómendedi, ashylýy 60 paıyzǵa deıin jaqsardy. Urlanǵan 5 myń mal basynyń 3 myńǵa jýyǵy nemese 56 paıyzy tabylyp, zańdy ıelerine qaıtaryldy», - dedi Qudııar Nurseıitov mınıstrliktiń baspasóz qyzmeti alańynda ótken brıfıngte.

Onyń atap ótýinshe, mınıstrliktiń bastamasymen jergilikti atqarýshy organdarǵa aýyl sharýashylyǵy janýarlaryn jaıý qaǵıdalaryn ázirleý jáne bekitý quzyreti berildi.

Soǵan sáıkes maldy baqylaýsyz jaıýǵa tyıym salyndy.

Bul tyıymdy buzǵany úshin 3-ten 10 aılyq eseptik kórsetkishke deıingi aıyppul belgilendi.

«Mal urlyǵyn anyqtaý jáne onyń jolyn kesý maqsatynda mınıstrlik veterınarııalyq baqylaý qyzmetkerleriniń jáne jergilikti atqarýshy organdardyń qatysýymen turaqty túrde jedel-profılaktıkalyq sharalar ótkizip turady. Mal urlyǵynyń toptyq túrimen kúresý úshin óńirlerde turaqty negizde jedel-izdestirý toptary jumys isteıdi»,- dedi ol.