Bıyl Ulttyq qordyń valıýtalyq aktıvi qansha kólemde boljanady
ASTANA. QazAqparat - Búgin Úkimet otyrysynda 2018-2022 jyldarǵa arnalǵan Qazaqstannyń áleýmettik-ekonomıkalyq damý boljamy maquldandy, dep habarlaıdy QazAqparat.
Otyrysta 2018 jylǵa arnalǵan negizgi makrokórsetkishter men bıýdjet parametrleriniń boljamy týraly baıandama jasaǵan QR Ulttyq ekonomıka mınıstri Tımýr Súleımenov túzetilgen makroboljam negizinde 2018 jylǵa arnalǵan respýblıkalyq bıýdjet parametrleriniń boljamyn naqtylady. Kirister 2018 jyly 5,7 trln teńge kóleminde baǵalanady.
«Bul bekitilgen josparǵa qaraǵanda 190 mlrd teńgege joǵary. Kirister boıynsha negizgi ulǵaıý paıdaly qazbalardy óndirýge arnalǵan salyqtan jáne shıki munaıǵa eksporttyq keden bajynyń túsimderinen qamtamasyz etiledi. Ulttyq qordan kepildendirilgen transfert buryn bekitilgen mólsherde saqtaldy. Nysanaly transfertti tartý qarastyrylmaǵan», - dedi ol.
Mınıstrdiń aıtýynsha, bıýdjet tapshylyǵy 2017 jylǵy bıýdjet qarajatynyń qaldyǵyn tartýdy eskere otyryp, jalpy ishki ónimge qatysty 1,5 paıyzdy quraıdy. Respýblıkalyq bıýdjet shyǵystary bekitilgen kólemge qaraǵanda 425 mlrd teńgege ulǵaıyp, 9,6 trln teńge kóleminde boljanyp otyr.
«Ulttyq qor túsimderi boljam boıynsha 546 mlrd teńgege ulǵaıady. 2018 jyldyń aıaǵynda 2,6 trln teńgeni quraıdy. Nátıjesinde jyl sońynda Ulttyq qordyń valıýtalyq aktıvteri 58,3 mlrd AQSh dollaryna jetedi dep boljanyp otyr. Bul jalpy ishki ónimge qatysty 34,7 paıyzdy quraıdy», - dedi Tımýr Súleımenov.
Mınıstr baıandamasynan keıin QR Premer-Mınıstri Baqytjan Saǵyntaev 2018-2022 jyldarǵa arnalǵan Qazaqstannyń áleýmettik-ekonomıkalyq damý boljamyn maquldaýdy tapsyrdy. Úkimet músheleri ony biraýyzdan qoldap, daýys berdi.
