Bıyl Ulttyq qordan kepildendirilgen transfert 2 trln. 880 mıllıard teńgeni quraıdy
ASTANA. QazAqparat - Búgin Senattyń Qarjy jáne bıýdjet komıtetiniń keńeıtilgen otyrysynda «Qazaqstan Respýblıkasynyń Ulttyq qorynan 2016-2018 jyldarǵa arnalǵan kepildendirilgen transfert týraly» Qazaqstan Respýblıkasynyń Zańyna ózgeris engizý týraly» zań jobasy qaraldy.
Atalǵan zań jobasy boıynsha Ulttyq qordan 2016 jylǵa kepildendirilgen transfert somasy túzetiledi. QR Ulttyq ekonomıka mınıstri Erbolat Dosaevtyń aıtýynsha, Qazaqstan Respýblıkasynyń 2016-2020 jyldarǵa arnalǵan áleýmettik-ekonomıkalyq damý boljamyn naqtylaýǵa baılanysty jáne AQSh dollarynyń eseptik kórsetkishi 300-den 360 teńgege ulǵaıtylady. «Osyǵan baılanysty Ulttyq qordan beriletin transfert kólemi 2016 jyly 2 880 mıllıard teńgeni quraıdy», - dedi mınıstr.
Sonymen qatar, komıtette «2016-2018 jyldarǵa arnalǵan respýblıkalyq bıýdjet týraly» Zańyna ózgerister men tolyqtyrýlar engizý týraly» zań jobasy qaraldy. Zań jobasyna sáıkes, 2016 jylǵa kiristerdiń naqtylanǵan boljamy (transfertterdiń túsimin eseptemegende) 3 365,3 mıllıard teńge bolyp belgilendi, bul buryn naqtylanǵan bıýdjetke 300,0 mıllıard teńgege az. Salyq túsimderi boıynsha boljam bekitilgen 305,0 mıllıard teńgege azaıyp, 3 189,8 mıllıard teńge somasynda belgilendi. 2016 jylǵa transfert túsimi 3 903,1 mıllıard teńge somasynda kózdelip otyr, onyń ishinde aıyrbas baǵamyn túzetýge jáne «Nurly Jol» memlekettik baǵdarlamasynyń shyǵystaryn qaıta qaraýǵa baılanysty 720,5 mıllıard teńgege ulǵaıyp, Ulttyq qor transferti 3 687,5 mıllıard teńge boldy.
Bıýdjet shyǵystary 600,2 mıllıard teńgege ósip, 8 266,8 mıllıard teńgeni quraıdy. Respýblıkalyq bıýdjet tapshylyǵy 2016 jyly 179,2 mıllıard teńgege ulǵaıyp, 902,7 mıllıard teńge nemese JІÓ-niń 2 paıyzy shamasynda belgilengen.
Zań jobasy aldaǵy ýaqytta ótetin palatanyń jalpy otyrysyna shyǵarylady.
