Bıyl Ulttyq banktiń aqsha-kredıt saıasaty qandaı bolmaq
ASTANA. QazAqparat - QR Ulttyq banki bank sektorynyń qarjylyq ornyqtylyǵyn arttyrý baǵdarlamasyn iske asyrýdy jalǵastyrady. Bul týraly Qazaqstan Respýblıkasy Úkimetiniń jáne Qazaqstan Respýblıkasy Ulttyq bankiniń ekonomıkalyq saıasattyń 2018 jylǵa arnalǵan negizgi baǵyttary jónindegi málimdemesinde aıtylǵan, dep habarlaıdy QazAqparat.
«Ulttyq bank ınflıatsııalyq targetteý jáne teńgeniń ózgermeli aıyrbastaý baǵamy saıasaty rejiminde aqsha-kredıt saıasatyn iske asyrýyn jalǵastyrady. Aǵymdaǵy jyly Ulttyq banktiń aqsha-kredıt saıasaty ınflıatsııany jyldyń sońynda neǵurlym tómen nysanaly baǵdar 5,0-7,0 paıyzǵa jetkizýge baǵyttalady. Bul maqsatty qamtamasyz etý ınflıatsııany 2020 jyldyń sońyna qaraı 4 paıyzǵa deıin birtindep tómendetýdiń mańyzdy qadamy bolady. Inflıatsııa boıynsha maqsatqa qol jetkizý úshin aqsha-kredıt saıasaty quraldarynyń standartty jıyntyǵy paıdalanylady, bul rette jekelegen elementterdi jetildirý jónindegi jumys jalǵastyrylady», - dedi málimdeme jobasyn tanystyrǵan Ulttyq bank tóraǵasy Danııar Aqyshev.
Onyń sózine qaraǵanda, Ulttyq bank bazalyq mólsherlemeni ınflıatsııanyń naqty jáne boljamdy mánderine qaraı belgileıtin bolady. Bul rette makroekonomıkalyq teńgerimdi saqtaý úshin naqty kórsetiletin bazalyq mólsherlemege ekonomıkanyń uzaq merzimdi ósý qarqynynan aspaıtyn deńgeıde qoldaý kórsetiledi.
«Ulttyq bank bank sektorynyń qarjylyq ornyqtylyǵyn arttyrý baǵdarlamasyn iske asyrýdy jalǵastyrady. Bankterdi birtindep qalypqa keltirý ekonomıkanyń naqty sektoryn kredıtteýge qoldaý kórsetedi. Qarjylyq retteý salasynda 2018 jyly jumys ınvestıtsııalyq sheshimder sapasyn arttyrýǵa, qarjy kompanııalary basshylary men ıeleriniń, táýelsiz aýdıtorlardyń qarjylyq eseptilik sapasy úshin jaýapkershiligin kúsheıtýge baǵyttalady. Sonymen birge, yryqtandyrylǵan valıýtalyq rejim saqtalǵan jaǵdaıda valıýtalyq baqylaýdy kúsheıtý jóninde sharalar qabyldaý boljanyp otyr», - dedi Ulttyq bank tóraǵasy.
