Bıyl Úkimet áleýmettik tapsyrysqa 9 mlrd. teńge bóldi - Tasmaǵambetov
ASTANA. QazAqparat - Bıyl Úkimet áleýmettik tapsyrysqa 9 mlrd. teńge bóldi. Búgin 7-shi Azamattyq forýmda sóz sóılegen QR Premer-Mınıstriniń orynbasary Imanǵalı Tasmaǵambetov osylaı aıtty, dep habarlaıdy QazAqparat.
«Bıyl álemdi sharpyǵan daǵdarysqa qaramastan Úkimet tek áleýmettik tapsyrysqa 9 mlrd. teńge bóldi. Esesine búkil elimizde qoǵamnyń san túrli baǵyty boıynsha eki myńnan asa joba iske asty. Júzdegen uıym odan ary damýǵa múmkindik alyp, myńdaǵan adam jumyspen qamtyldy. Kórip otyrsyzdar, buryn basqasha edi. Úkimet barlyq máseleni sheshýdi óz qolyna alatyn. Al qazirgi zaman aǵymy bólek. Ol da bolsa ózderińiz sııaqty oı-órisi eseli tulǵalar men qyzmeti belsendi uıymdardyń arqasy», - dedi ol.
Tastamaǵambetov el-jurtymyzdyń turmysyn jaqsartyp, ómir sapasyn kóterý isine azamattyq kúshterdiń úlesi de, salmaǵy da erekshe ekendigin basa aıtty. Al ómir sapasy degenimizdiń ózi jınaqtap aıtqanda árbir otbasynyń molshylyq pen berekeli turmysy, myqty densaýlyǵy, balalarynyń sapaly bilimi men jaqsy tálim-tárbıesi, qaýipsizdigi men qolaıly qorshaǵan ortasy ekendigin atap ótti.
«Munyń barlyǵy osy jıynnyń aıasynda qyzý oı elegeninen ótip, tıimdi de túsinikti kózqarastarǵa aınalǵany anyq. Bul usynystar mindetti túrde qazir jobasy daıyndalyp jatqan jańa zańǵa da, kelesi jyly jarııalanatyn áleýmettik tapsyrystarda da eskeriletin bolady», - dedi Tasmaǵambetov.
