Bıyl UBT tapsyrýǵa 130 myńnan astam talapker ótinish berdi

NUR-SULTAN. QazAqparat – Bıyl Ulttyq biryńǵaı test tapsyrýǵa 130 myńnan astam talapker ótinish berdi. Bul týraly QR BǴM Joǵary jáne joǵary oqý ornynan keıingi bilim departamenti dırektory Ádilet Toıbaev aıtty, dep habarlaıdy QazAqparat tilshisi.

«Bıyl Ulttyq biryńǵaı testileý 28 sáýirde bastalyp 14 mamyrǵa deıin jalǵasady. Ótinishterdi qabyldaý ádettegideı Ulttyq testileý ortalyǵynyń saıtynda júrgizilip jatyr. Osy kúnge deıin 130 myńnan astam talapker óz ótinishterin berip úlgerdi. Osy jyldyń túlekteri úshin asa mańyzdy jańalyqtyń biri - ol talapkerdiń eki ret negizgi UBT tapsyrýǵa múmkindik berilip otyr. Demek, UBT kezinde testileýshiniń test tapsyrýǵa eki múmkindigi bar. Ekeýiniń biriniń nátıjesin tańdap, konkýrsqa qatysa alady. UBT 16 mamyr men 5 shilde aralyǵynda ótedi», dedi departament dırektory Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, negizgi UBT-ǵa orta bilim berý uıymdarynyń osy jylǵy túlekteri; orta bilim berý uıymdarynyń ótken jylǵy bitirýshileri men tehnıkalyq jáne kásiptik nemese orta bilimnen keıingi bilim berý uıymdarynyń bitirýshileri jáne basqa da sanattaǵy talapkerler qatysa alady.

«Pánderdiń sany ózgerissiz qalady – úsh mindetti jáne eki tańdaý boıynsha. Tapsyrmalarynyń sany – 120. Ózgeris bolǵan joq. Onyń ishinde Qazaqstan tarıhynan - 15, matematıkalyq saýattylyqtan - 15, oqý saýattylyǵynan - 20 jáne eki beıindik pánnen 35 suraqtan bolady. Eń joǵarǵy upaı sany – 140. Testileýdiń jalpy ýaqyty – 4 saǵat», dedi dedi Ádilet Toıbaev.