Bıyl UBT suraqtaryna qatysty eshqandaı eskertýler bolǵan joq - Bilim mınıstri
ASTANA. 10 maýsym. QazAqparat - Bıyl Ulttyq biryńǵaı testileý tapsyrmalaryna qatysty eshqandaı eskertýler bolǵan joq.
Búgin BAQ ókilderine UBT nátıjesi boıynsha eksklıýzıvti suhbat bergen Bilim jáne ǵylym mınıstri Baqytjan Jumaǵulov osylaı málimdedi.
Mınıstrdiń aıtýynsha, UBT-ny ótkizý jumystary barynsha jan-jaqty daıyndyqpen júzege asty. «Biz buǵan deıingi kemshilikter men olqylyqtardy, eskertýlerdi zerdelep qana qoımaı, on jyldaǵy jumysqa saraptama jasap shyqtyq. Sonyń arqasynda test tapsyrmalarynyń sapasy jaqsardy. Buny appelıatsııa nátıjelerinen kórýge bolady. Máselen, osy jyldar ishinde 700 appelıatsııa berilse, sonyń 0,1 paıyzy ǵana qanaǵattandyrylǵan. Sonymen birge, biz álemdik tájirıbelerdi, sońǵy jyldardaǵy eskertpelerdi esepke ala otyryp, test tapsyrmalarynyń 50 paıyzǵa jýyǵyn qaıta qarap shyqtyq. Qazaqstannyń eń úzdik pedagogtary saýaldar ázirleýge atsalysty. Sondyqtan da bıyl test tapsyrmalaryna qatysty eshqandaı da eskertý bolǵan joq», - dedi B. Jumaǵulov.
Onyń aıtýynsha, sońǵy jyldary mektep ustazdarynyń da, oqýshylardyń da testileýge degen kózqarastary ózgerdi. «Burynǵydaı 10-11 synyptarda oqýshylar ýaqytyn jappaı test tapsyrmalaryn jattaýmen ótkizbeıdi. Al test tapsyrmalarynda eń bastysy, standartty oryndaýlarǵa salmaq jasap, logıkalyq suraqtardyń sanyn arttyrdyq. Osynyń arqasynda bıyl jaqsy kórsetkishke de qol jetkizip otyrmyz», - dedi B. Jumaǵulov. Mınıstrdiń sózine qaraǵanda, Elbasynyń tapsyrmasyna sáıkes ár oblysta test sapasyn baqylaıtyn departamentter qurylǵan.
