Bıyl ýaqytsha ustaý abaqtysynda zańsyz ustalǵan 1152 adam anyqtaldy - Bas prokýror
ASTANA. 21 jeltoqsan. QazAqparat 2012 jyly elimizdegi ýaqytsha ustaý ızolıatorlarynda zańsyz ustalǵan 1152 adam anyqtalyp, bosatyldy.
Bul týraly búgin aǵymdaǵy jyldy qorytyndylaýǵa arnalǵan keńeıtilgen alqa otyrysynda QR Bas Prokýrory Ashat Daýylbaev málim etti.
Bas prokýrordyń aıtýynsha, prokýratýra qyzmetkerleri jumysynyń basym baǵyttarynyń biri qylmystyq úderister barysyndaǵy azamattardyń konstıtýtsııalyq quqyn qorǵaý bolyp tabylady. «Bul baǵytta azamattardyń konstıtýtsııalyq quqyn qorǵaýdyń naqty tetigin kezekshi prokýratýra ınstıtýty atqaryp keledi. Onyń tabysty qyzmet etýi azamattarǵa qatysty olardy zańsyz ustaý nemese basqa da zańǵa qaıshy faktilerdiń aldyn alýǵa zor septik bolyp tabylady», - deıdi A. Daýylbaev.
Onyń aıtýynsha, qabyldanǵan sharalardyń arqasynda qyzmettik kabınetterde, qylmystyq qýdalaýdyń basqa da mekemelerinde azamattardy zańsyz ustaý faktileri 20 paıyzǵa azaıǵan. Budan bólek, prokýratýra ókilderi negizsiz atqarylatyn jedel-izdestirý sharalaryna tyıymdar jasap, syrttaı baqylaýǵa alynǵan 450-den astam azamattyń quqyn qorǵaǵan.
