Bıyl Túrkistan oblysynda jemqorlyqqa jol bergen 17 memlekettik qyzmetker sottaldy
Bul týraly QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departament basshysy Hákim Kóshqalıev málim etti, dep habarlaıdy QazAqparat tilshisi.
«Bıyl oblysta sybaılas jemqorlyq áreketine barǵan 19 azamatqa qatysty 16 qylmystyq is sotqa jiberildi. Odan bólek biz 70 qylmystyq isti toqtatý týraly sheshim qabyldadyq. Sonymen qatar jyl basynan beri Túrkistan oblysynda sybaılas jemqorlyq áreketin jasaǵan 22 adam sottaldy. Onyń ishinde 17-i memlekettik qyzmetker, qalǵan 5-ýi quqyq qorǵaý organy qyzmetkerleri», - dedi Hákim Kóshqalıev Antikor Live jobasynyń tikeleı efırinde.
Odan bólek, departament basshysy qaramaǵyndaǵy qyzmetkeri paraqorlyq áreketke barǵany úshin birneshe tulǵanyń jaýapqa tartylǵanyn aıtty.
«Sybaılas jemqorlyqpen kúreste qoǵam nazaryndaǵy basty máseleniń biri qyzmetker para alǵan nemese bergen jaǵdaıda onyń basshysyn da qyzmetten bosatý. Osy máseleni keńinen qaraý maqsatynda bıyl oblysta ákimniń jáne basqa da quzyrly organdardyń qatysýymen 2 jıyn ótti. Ol jerde basshylarmen qatar qyzmetkerge jaýapkershiliktiń mańyzdylyǵy túsindirildi. Bıyl Túrkistan oblysy boıynsha 6 tulǵa qaramaǵyndaǵy qyzmetkeri sybaılas jemqorlyq áreketine barǵany úshin jaýapqa tartyldy», - deıdi ol.
Buǵan deıin habarlaǵanymyzdaı, Túrkistan oblysynda sybaılas jemqorlyq áreketiniń aldyn alyp habarlasqan azamattarǵa 1,5 mln teńge kóleminde syıaqy berildi.
Sondaı-aq, H. Kóshqalıev atalǵan oblysta qaı salany jemqorlyq jaılaǵanyn aıtyp berdi.