Bıyl Túrkistan oblysynda birinshi synypqa 52 myńǵa jýyq bala bardy
TÚRKІSTAN. QazAqparat – Bıyl Túrkistan oblysynda mektep tabaldyryǵyn alǵash attaǵan oqýshylar sany – 51 954. Ata-anasynyń ótinishimen olardyń 40 paıyzy, ıaǵnı 20 844 oqýshy kezekshi toptarda bilim ala bastady, dep habarlaıdy QazAqparat.
Oblys ákiminiń baspasóz qyzmetinen málim etkendeı, bilim uıalarynda barlyq sanıtarlyq talaptar qatań saqtalady. Shtattyq rejımde jumys jasaýǵa kirisken mektepterdiń daıyndyǵy tolyqtaı tekserýden ótken.
Túrkistan oblysy boıynsha adamı áleýetti damytý basqarmasynyń málimetinshe, óńirdegi 912 mektep josparǵa saı óz jumysyna kirisken. Byltyrǵy oqý jylynda 910 mektep jumys istese, bıyl Ordabasy aýdanynan 600 oryndyq 1 mektep jáne Jetisaı aýdanynan 200 oryndyq 1 mektep iske qosyldy. Onyń ishinde 164 mektep shtattyq rejımde jumys istep, 16 375 oqýshyǵa bilim berýde.
«Jalpy, óńir mektepterinde bala sany 499 535-i quraıdy. Aýdandarǵa tıisti 4000 myń dana planshet «Bilim» tarıftegi sımkartasymen birge, qujattary rásimdelip, erteńnen bastap aýdandarǵa jóneltiledi. Bul tehnıkalar, eń aldymen áleýmettik osal toptaǵy, kópbalaly jáne az qamtamasyz etilgen otbasylardyń balalaryna beriletin bolady. Jalpy, barlyq tehnıkany kelisimshartta kórsetilgen merzimde ýaqytynda jetkizý máselesi baqylaýǵa alynǵan», - dedi ákimdikten.
