Bıyl Túrkistan oblysynda 340 myń tonna maqta jınalady
TÚRKІSTAN OBLYSY. QazAqparat - Túrkistan oblysy boıynsha 131,1 myń gektar alqapqa maqta egilse, Jetisaı aýdany boıynsha 45 028 ga aýmaqty quraıdy. Qazirgi tańda aýdan boıynsha 1097,5 gektardan maqta jınalyp, ortasha ónimdilik gektaryna 21,6 tsentnerdi qurap otyr.
Bul týraly Túrkistan oblysy Óńirlik kommýnıkatsııalar qyzmetiniń kóshpeli baspasóz máslıhatynda Jetisaı aýdandyq aýyl sharýashylyǵy bóliminiń mamany Dastan Dúısenbaev málimdedi.
Aıta keterligi, Túrkistan oblysynda bıyl egilgen 131,1 myń gektar maqta alqabynan 340 myń tonna ónim alý josparlanyp otyr. Búgingi kúnge deıin oblys boıynsha 1,44 myń gektar alqaptan 3,2 myń tonna maqta jınalyp, ónimdilik 21,8 ts/ga qurap otyr.
Jetisaı aýdanynda aýyl sharýashylyǵy salasyndaǵy jalpy ónim kólemi aǵymdaǵy jyldyń 8 aıynda 3,5 mlrd. teńgege artyq óndirilgen.
«2019 jyly aýdanda 77,3 myń gektardan astam jerge aýyl sharýashylyǵy daqyldary egildi. Onyń ishinde dándi daqyldar – 4931 ga, maqta – 45028 ga, kókónis jáne baqsha daqyldary – 19884,6 ga, mal azyqtyq daqyldary – 6474 ga, jemis jıdek jáne júzim – 883,7 ga. Osylardan alynǵan ónimge kelsek, dándi daqyldardan – 16951 tonna, kókónis jáne baqsha daqyldarynan –557661,6 tonna, mal azyqtyq daqyldardan – 101882,4 tonna, jemis-jıdek jáne júzimnen – 7152 tonna ónim alyndy», - dedi Dastan Dúısenbaev.
Aýylsharýashylyǵy daqyldarynan mol ónim alýdyń birden-bir joly – ol tuqym sapasyn arttyrý. Osyǵan baılanysty aýdanda otandyq shıt daıyndaý jumystary júrgizilýde. Búgingi kúnge aýdanda 3 tuqym sharýashylyǵy jumys isteıdi. Memleket tarapynan tuqym sharýashylyǵyn qoldaý sharalary da júrgizilýde.
