Bıyl Túrkistan oblysynda 27 eldi mekenge tabıǵı gaz júrgiziledi
TÚRKІSTAN.QazAqparat - Túrkistan oblysynda 635 eldi mekenge taza aýyz sý jetkizilip, qamtý deńgeıi 75,4 paıyzdy qurady.
Ótken jyly sý qubyry múldem joq 13 eldi mekenge jańa aýyz sý qubyrlary tartylyp, taǵy bir aýyldyń tozyǵy jetken sý júıeleri jańartyldy. Bul týraly oblys ákimi Janseıit Túımebaev málimdedi, dep habarlaıdy QazAqparat tilshisi.
Aımaq basshysynyń sózinshe, 800 myńnan astam adamǵa (310 eldi meken) qoljetimdi baǵamen aýyz sýdy jetkizý maqsatynda 2 mlrd teńge somasynda sýbsıdııa bólingen. Al, aǵymdaǵy jyly 43 eldi mekenge ortalyqtandyrylǵan aýyz sý qubyry salynyp, qamtylǵan jalpy eldi mekender sanyn 678-ge jetkizý josparlanýda. Óńirde sondaı-aq turǵyndardy tabıǵı gazben qamtý isi de júıeli júrgizilýde.
«2018 jyly 96 tabıǵı gaz nysanynyń qurylysy júrgizilip, jyl qortyndysy boıynsha 62-isinde qurylys jumystary atqaryldy. Nátıjesinde, 385 eldi mekendi nemese 1 mln 72 myń adamdy (54,3%) tabıǵı gazben qamtý múmkindigi paıda boldy. Bıylǵy jyly 27 eldi mekenge tabıǵı gaz júrgiziledi. Kógildir otynmen qamtylǵan eldi mekender 412-ge jetip, qamtý deńgeıi 48,9% quraıdy dep kózdelýde»,- dedi oblys ákimi.
Janseıit Túımebaevtyń aıtýynsha, óńirde sapaly elektrmen jabdyqtaý baǵytynda da qarqyndy qumystar júrgizilýde. Máselen, ótken jyly 22 eldi meken men 6 qalalyq móltek aýdannyń elektrmen jabdyqtaý qurylysy aıaqtalyp, paıdalanýǵa tapsyryldy. Nátıjesinde, qosymsha 35 300 turǵyn sapaly, turaqty elektr energııasymen qamtyldy.
Aıta keteıik, oblysta 826 eldi meken ortalyqtandyrylǵan elektr jelisimen, 16 shalǵaıdaǵy eldi meken derbes elektr qondyrǵylarymen qamtamasyz etilgen. Al, aǵymdaǵy jyly 13 elektrmen jabdyqtaý nysanynyń qurylysyn aıaqtap, iske qosý josparlanýda. Nátıjesinde, 15 800 turǵyn sapaly ári turaqty elektr energııasymen qamtylatyn bolady. Sonymen qatar, Saryaǵash aýdanynda 220 kılovolttik qosalqy stantsııasynyń qurylysy bastalyp, 2020 jyly paıdalanýǵa tapsyrý josparlanýda.
