Bıyl Túrkistan oblysynda 12 jańa mektep paıdalanýǵa beriledi
TÚRKІSTAN. QazAqparat - Túrkistan oblysynda jalpy 906 mektep bar. Onyń 900-i — memlekettik, altaýy jekemenshik. Bıyl qosymsha 12 jańa mektep paıdalanýǵa beriledidep habarlaıdy QazAqparat.
Bul týraly Óńirlik kommýnıkatsııalar qyzmetinde ótken brıfıngte oblystyq Adamı áleýetti damytý basqarmasynyń basshysy Raqymbek Jolaev málimdedi.
Onyń aıtýynsha, oblysta 5 úsh aýysymda bilim beretin mektep bar. Ótken jyly úsh aýysymda bilim berip kelgen 3 mekteptiń qurylysy paıdalanýǵa berilgen.
«Oblysymyzda 4 mekteptiń ǵımaraty apatty jaǵdaıda bolatyn. Byltyr 2 apatty mekteptiń ornyna jańa ǵımarattary salynyp paıdalanýǵa tapsyryldy. 2020 jyly 7 apatty mekteptiń ornyna jańasyn salý maqsatynda 3 mekteptiń qurylysyna qarjy bólinip otyr. Respýblıka boıynsha dárethanasy dalada ornatylǵan 2352 mektep bar bolsa, sonyń 60 paıyzy Túrkistan oblysynda ornalasqan. 2020 jyldyń 1 qyrkúıegine deıin barlyq mektepterdegi ishki dárethanalar qalpyna keltirilip, syrtqy dárethanalar sanıtarlyq talaptarǵa sáıkestendirledi. Mektepterge túgel qorshaýlar qoıylady», - dedi basqarma basshysy.
Oqýshylardyń qaýipsizdigi úshin oblystaǵy 900 mekteptiń 98 paıyzynda beınebaqylaý júıesi ornatylǵan. Jyl sońyna deıin oblysymyzdaǵy mektepter beınebaqylaý júıesimen 100% qamtylmaq.
Aıta keterligi, oqýshylardy qosymsha bilimmen qamtýdy 70 paıyzǵa jetkizý maqsatynda 11 aýdanda «Oqýshylar úıi» ashylýda.
«Oblysymyzdyń 138 oqýshysy halyqaralyq jáne respýblıkalyq baıqaýlardyń júldegerleri atandy. UBT qorytyndysy boıynsha eń joǵary 140 baldy respýblıkada tek bizdiń oblys túlegi ǵana ıelendi. Sonymen qatar, 2019 jyldyń qorytyndysymen oblysymyzdyń 3 pedagog qyzmetkeri respýblıkada «Jyldyń úzdik pedagogy» atandy. Sondaı-aq, «WorldSkills-2019» respýblıkalyq chempıonatynda oblysymyzdy 17 kolledj stýdenti jeńimpaz atandy», - dedi Rahymbek Jolaev.
