Bıyl Túrkistan oblysynda 10 myńǵa jýyq otbasy baspanaly bolady
Ótken jyly Túrkistan oblysynda barlyq qarjylandyrý kózderinen 823,8 myń sharshy metr turǵyn úı paıdalanýǵa berilgen bolatyn. Jyl sońynda Túrkistan qalasyndaǵy ákimshilik-iskerlik ortalyǵy aýmaǵyndaǵy 14 kópqabatty turǵyn úıdiń 763 páteri «Otbasy bank» arqyly jáne kópqabatty 3 turǵyn úıdiń 151 páteri «7-20-25» baǵdarlamasy arqyly turǵyndarǵa usynyldy. Sonymen birge 610 otbasy úıli boldy, onyń 470-i – kópbalaly ana. Jalpy túrli baǵdarlamalar jáne naqty satyp alý arqyly júzdegen otbasy jańa baspanaǵa kirgen. Al, qazirgi kezde oblysta 220 úı salynyp jatyr.
Túrkistan oblysynyń ákimi Ómirzaq Shókeev ákimshilik-iskerlik ortalyǵy jáne ózge de aýmaqtardaǵy turǵyn úılerdiń qurylys barysyn qadaǵalap, merdigerlermen kezdesti.
Turǵyn úılerdiń ınfraqurylymy, elektr, jylý júıesi talapqa saı bolýy kerektigin aıtqan óńir basshysy qurylys sapasy qatań baqylaýda turǵanyn eskertti.
– Turǵyndar úshin qolaıly jaǵdaı jasalýy tıis. Sondyqtan osy salaǵa jaýapty basshylar men merdigerler úılerdi talapqa saı etip salýlary kerek. El senimin aqtaý – paryz, – dedi Ómirzaq Shókeev.
Aıta keteıik, qazirgi tańda oblys boıynsha turǵyn úıge muqtaj azamattar kezeginde 45 myńnan astam azamat tirkelgen.
