Bıyl «Túrkistan-Abý-Dabı» baǵytynda áýe reısi ashylady
Túrkistandaǵy halyqaralyq áýejaıdy damytý, jumysyn jandandyrý máselesi talqylandy. Onda oblystyq jolaýshylar kóligi jáne avtomobıl joldary basqarmasynyń basshysy Rolan Ibragımov áýejaıdyń qazirgi jaı-kúıi men atqarylyp jatqan jumystardyń barysy týraly baıandady.
Búgingi tańda Túrkistan áýejaıynan Ystanbul jáne El-Kýveıt qalalaryna halyqaralyq baǵyt jumys istep tur. Sonymen birge Astana, Almaty, Aqtaý, Qaraǵandy, Aqtóbe jáne Oral qalalaryna da turaqty reıster bar. «Turkish Airlines», «Jazeera Airways», «FlyArystan», «Scat», «Qazaq Air» jáne «ıÝjnoe nebo» áýe kompanııalary qyzmet kórsetýde.
Aldaǵy ýaqytta Túrkistan qalasynan halyqaralyq áýe reısterin ashý, Óskemen, Pavlodar, Atyraý, Kókshetaý, Úsharal qalalaryna sýbsıdııalanatyn áýe reısterin uıymdastyrý josparlanǵan. Astana jáne Astana qalalaryna qoldanystaǵy reıster sany ulǵaıtyldy. Bıyl qazan aıynda «Túrkistan-Abý-Dabı» baǵytyn ashý boıynsha kelissózder júrip jatyr.
Basqosýda oblys ákimi Darhan Satybaldy zamanýaı áýejaıdyń múmkindigi men áleýeti tolyq qoldanylmaı otyrǵandyǵyna toqtaldy.
«Halyqaralyq jáne ishki baǵyttardy kóbeıtý kerek. Sheteldiń iri áýe kompanııalarymen baılanys nashar. Áýejaı jumysyn týrızm salasymen baılanystyra damytýdy usynamyn. Jaýapty basqarmamen birlese jumys atqaryp, týrıster sanyn arttyrǵan jón. Túrkistan halyqaralyq áýejaıynyń logıstıkalyq áleýetin de arttyryp, júk tasymalyn ulǵaıtý mańyzdy. Áýejaıdyń damý jospary, strategııasy bolýy qajet, – dedi Darhan Satybaldy.
Aıta keteıik, Túrkistan áýejaıynyń jolaýshylar aǵyny 2022 jyly 373,8 myń jolaýshyny quraǵan. Onyń ishinde 81,3 myń adam halyqaralyq reıspen ushsa, el ishinde 292,5 myń jolaýshy tasymaldanǵan. Kórsetkish 2021 jylmen salystyrǵanda 24%-ǵa artqan. Jolaýshylar tasymaly boıynsha Túrkistan áýejaıy respýblıkada 7-orynda tur.
