Bıyl tozǵan jylý jelilerin jańartýǵa 69,4 mlrd teńge bólindi - mınıstr

ASTANA. QazAqparat – 2029 jylǵa qaraı jylýmen jabdyqtaý jelileriniń tozýyn 43 paıyzǵa deıin tómendetý mindeti tur. Bul týraly Úkimet otyrysynda Indýstrııa jáne ınfraqurylymdyq damý mınıstri Marat Qarabaev aıtty, dep habarlaıdy QazAqparat tilshisi.

«Kommýnaldyq menshiktegi jylý jelilerin jańǵyrtý maqsatynda mınıstrlik qarjylandyrýdyń úsh tetigin iske asyrýda: nysanaly transfertter, bıýdjettik kredıt, shyǵyndardy 50 paıyzǵa deıin sýbsıdııalaý», - dedi ol.

Mınıstrdiń dereginshe, jylý jelilerin qarjylandyrý úshin respýblıkalyq bıýdjetten nysanaly transfertter bólý boıynsha bıýdjettik baǵdarlama ashyldy. Bul rette qarjylandyrý bıýdjettik kredıtteý tetigi arqyly 20 jyl merzimge 0,01 paıyzben, al jeke uıymdar úshin sýbsıdııalaý tetigi arqyly jalǵastyrylatyn bolady.

«2023 jylǵy respýblıkalyq bıýdjetti naqtylaý kezinde tozý kórsetkishi 75 paıyzdan asatyn 47 jobany iske asyrýǵa 69,4 mlrd teńge bólindi. Bul qarajatqa shamamen 107 shaqyrym jylý jelilerin qaıta jańartý josparlanýda.

Jalpy, 2029 jylǵa qaraı jylýmen jabdyqtaý jelileriniń tozýyn 43 paıyzǵa deıin tómendetý mindeti tur. Jergilikti atqarýshy organdar jylýmen jabdyqtaý jobalary boıynsha tıisti ótinimder men qujattamalardy usyný jónindegi jumysty jandandyrýy qajet. Búginde 2024 jylǵy respýblıkalyq bıýdjetti qalyptastyrýda 54,7 mlrd teńge somasyna jylý júıeleriniń 43 jobasyna ǵana ótinimder bar», - dedi Marat Qarabaev.