Bıyl tótenshe jaǵdaılardan 4,3 myń qazaqstandyq qutqarylǵan
NUR-SULTAN. QazAqparat - QR ІІM Tótenshe jaǵdaılar komıtetinde Otan qorǵaýshy kúnine oraı saltanatty is-shara ótti. Vedomstvo qyzmetkerlerin merkemen Іshki ister mınıstriniń orynbasary ıÝrıı Ilın quttyqtady, dep habarlaıdy QazAqparat.
Komıtettiń baspasóz qyzmeti taratqan aqparatqa súıensek, bıylǵy jyl basynan beri tótenshe jaǵdaı ókilderi 4,3 myń adamdy qutqaryp, 7,5 myń adamdy qaýipti aýmaqtan evakýatsııalady. Tosyn jaıttar kezinde zardap shekken 1,2 myń adamǵa alǵashqy medıtsınalyq kómek kórsetilip, 18 myń ret shuǵyl shaqyrtýlarǵa attanǵan.
Sala mamandarynyń osy eńbegi Otan qorǵaýshy kúninde laıyqty eskerilip, Qazaqstan Respýblıkasy Prezıdentiniń Jarlyqtaryna sáıkes 10 órt sóndirýshi men qutqarýshy erlikteri men minsiz qyzmetteri úshin marapattaldy.
QR Prezıdenti Q. Toqaevtyń qolynan «Erligi úshin» medalin Qaraǵandy oblystyq TJD Órt sóndirý jáne apattyq-qutqarý jumystary qyzmetiniń №1 órt sóndirý bóliminiń bólimshe komandıri A.G. Mınaev, qalalyq TJD Órt sóndirý jáne apattyq-qutqarý jumystary qyzmetiniń №1 órt sóndirý bólimi bastyǵynyń orynbasary A.B. Kenjeshov aldy.
Shara sońynda Tótenshe jaǵdaılar komıtetiniń qurylymdyq bólimsheleri arasynda shaǵyn fýtbol men ústel tennısinen kýboktar sarapqa salyndy.
