Bıyl tórtinshi MÓZ-diń tehnıkalyq-ekonomıkalyq negizdemesin ázirleý boıynsha jumystar júrgizilýde- B. Saǵyntaev

ASTANA. QazAqparat - Úkimet búginde Memleket basshysynyń tapsyrmasy boıynsha elimizdegi tórtinshi munaı óńdeý zaýytynyń qurylysyna baılanysty máseleni belsendi qarastyrýda.

Bul týraly búgin munaı-gaz sektoryn damytýǵa arnalǵan Májilistegi parlamenttik tyńdaýda QR Premer-Mınıstriniń birinshi orynbasary Baqytjan Saǵyntaev málim etti.

«Tehnıkalyq ekonomıkalyq parametrler aıqyndalýda, sondaı-aq bıyl tehnıkalyq-ekonomıkalyq negizdemeni ázirleý baǵytynda jumystar júrgizilýde»,-dedi ol.

Bıylǵy naýryzda QR Energetıka vıtse-mınıstri Maǵzum Myrzaǵalıev tórtinshi MÓZ máselesimen aınalysatyn jumys tobyn qurǵandyǵyn habarlaǵan bolatyn. Bul turǵyda aldymen zaýyttyń ornalasatyn jerin anyqtaý, onyń qýattylyǵy men ortasha qunyn aıqyndaý sharalary atqarylady. Sonymen qatar zaýyttyń ónimin ótkizetin qandaı naryqtar baryn baǵamdaý maqsaty tur.