Bıyl Tóle bı aýdanynda 6 mektep salynady
TÚRKІSTAN. QazAqparat - Tóle bı aýdanynda mektepterdiń tapshylyǵyna baılanysty halyq tyǵyz ornalasqan eldi mekenderde 6 bilim uıasy salynatyn bolady. Túrkistan oblysy ákiminiń baspasóz qyzmeti aýdanǵa uıymdastyrǵan press-týry barysynda BAQ ókilderi Kıelitas aýylynda boı kóterip jatqan M.Áýezov atyndaǵy jalpy orta mekteptiń qurylysymen tanysty, dep habarlaıdy QazAqparat.
Atalǵan bilim uıasynyń jobasynda akt zaly, sport zaly, ashana, sheberhana, kitaphana salý josparlanǵan. Nysannyń konkýrstyq quny 324 mln 985,5 myń teńge. Jospar boıynsha mektep jańa oqý jylyna qaraı paıdalanýǵa beriledi. Qazirgi tańda, abattandyrý, qural-jabdyqtardy ornatý, ishki jáne syrtqy tazalyq jumystary júrgizilýde.
Sondaı-aq zamanaýı úlgidegi mekteptiń biri Leńgir qalasynda salynady. Ondaǵy №1 mektep-gımnazııasyna 300 oryndyq oqý blogy, ashana, sheberhana, sport zaly, akt zaly, kitaphana qarastyrylǵan. Jobanyń quny - 803 mln 932, 2 myń teńge.
Sonymen qatar, aýdan ortalyǵyndaǵy №5 mektep gımnazııasyna oqý blogy, ashana, sport zaly, kitaphana jáne sheberhanamen qamtylǵan jańa ǵımarat salynyp jatyr. Jobanyń jalpy quny - 429 mln 066, 9 myń teńge.
«Al Aqbastaý aýylynda 200 oryndyq orta mektebiniń qurylys jumystary bastaldy. Nysannyń quny 701 mln 680, 5 myń teńge. 2019 jylǵa oblystyq bıýdjetten qurylys-montajdaý jumystaryn bastaýǵa 200 mln teńge qarastyrylǵan. Búginde nysannyń jer qazý jumystary júrgizilýde. Odan bólek, Kóksáıek aýylynda 100 oqýshyǵa shaqtalǵan bastaýysh mektebi boı kóteredi. Qurylys jumystarynyń konkýrstyq quny 257 mln 213, 9 myń teńgeni quraıdy. 2019 jylǵa aýdandyq bıýdjetten qurylys-montajdaý jumystaryn bastaýǵa 50 mln teńge qarastyryldy», - delingen oblys ákimdiginiń málimetinde.
Aýdandaǵy altynshy nysan Aqqum aýylynda salynady. Q.Tynybekov atyndaǵy orta mektepte sport zaly salynatyn bolady. Qurylys jumystarynyń konkýrstyq quny - 164 mln 173, 6 myń teńge. 2019 jylǵa aýdandyq bıýdjetten qurylys-montajdaý jumystaryn bastaýǵa 50 mln teńge kózdelip otyr.
Aıta keteıik, jalpy aýdanda 67 mektep bar. Onda 25 900-den astam oqýshy bilim alady.
