Bıyl tirkelmegen dári- dármek satýdyń 2 faktisi ǵana anyqtalǵan
ALMATY. QazAqparat - Bıyl el aýmaǵynda tirkelmegen dári- dármek satýdyń eki derek anyqtaldy. Jalpy, Almatyda 1300-den jýyq dárihana resmı túrde jumys isteıdi. Bul týraly Óńirlik kommýnıkatsııalar qyzmetiniń brıfınginde QR Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń Almaty qalasy boıynsha departamenti basshysynyń orynbasary Murat Muhamedıarov aıtty, dep habarlaıdy QazAqparat tilshisi.
Onyń aıtýynsha, jıi kezdesetin zańbuzýshylyqtardyń biri – dárihana uıymdary men medıtsınalyq uıymdardyń jaǵdaıynda dárilik zattardy saqtaý tártibin buzý, sondaı-aq dárilik zattardy retseptsiz berý. Basqa buzýshylyqtar bolyp jatady, biraq óte sırek.
«Mysaly, bıyl Qazaqstan aýmaǵynda tirkelmegen dárilik preparattardy satýdyń eki faktisi tirkeldi»,- deıdi ol.
Sonymen qatar Murat Muhamedıarov dárihanalarǵa qoıylatyn talaptarǵa toqtaldy.
«Eger dárihanany jeke kásipker ashsa, onda jeke tulǵanyń joǵary farmatsevtıkalyq bilimi bolýy, úı-jaıdyń aýdanyna qoıylatyn talaptardy saqtaý (dárihana úshin ol keminde 30 sharshy metr), qajetti qural-jabdyq bolýy kerek. Medıtsınalyq jáne farmatsevtıkalyq baqylaý komıtetiniń departamentiniń saıtynda dárihana uıymdarynyń qyzmetine qatysty barlyq normatıvtik-quqyqtyq aktilermen tanysýǵa bolady. Búgingi tańda bizde 1353 dárihana uıymy, 341 dıstrıbıýtordyń kóterme qoımasy jáne 32 óndiristik nysan derekter bazasynan ótedi», - dedi spıker.
