Bıyl Temirtaýdaǵy JEO-2 jańǵyrtý jumystary bastalady
ASTANA. QazAqparat - Qaraǵandy oblysynyń Temirtaý qalasyndaǵy JEO-2-de 2018-shi jyly №7 qazandyqtyń qurylysy bastalady. Bul týraly oblys ákimi Erlan Qoshanov halyq aldyndaǵy eseptik kezdesýi barysynda málimdedi, dep habarlaıdy QazAqparat ákimdiktiń baspasóz qyzmetine silteme jasap.
«Barlyqtaryńyz bilesizder, JEO-2 jylý tapshylyǵyn bastan keshýde. Stantsııa jabdyqtarynyń tozyǵy ábden jetken. Osyǵan deıin biz sáıkesinshe qazandyqtardy jáne týrbınalardy jóndeý arqyly jaǵdaıdy qadaǵalap otyrdyq. 2017-shi jyly jóndeý kampanııasy erekshe baqylaýmen ótti. Aıazdy kúnderdi úlken aqaýlarsyz ótkerdik. Degenmen, bul qur qoldaý sharalary. Stantsııaǵa qýat tapshylyǵyn joıý qajet. Ol úshin stantsııany tolyqtaı jańǵyrtý kerek. Ol jumystardyń bastaýy bıyl iske kiristirilgeli otyrǵan №7 qazandyqtyń qurylysy bolmaq», - dedi aımaq basshysy.
Erlan Qoshanov energetıka salasyndaǵy basqa da jobalarǵa toqtala ketti. Stantsııalardy keńeıtýdiń arqasynda Jezqazǵan, Balqash qalalary jáne Topar kentinde jylýmen qamtý jaǵdaıy jaqsaratyn bolady.
Qaraǵandy jáne Jezqazǵan qalalaryndaǵy jylý jelilerin qaıta qalypqa keltirýge shamamen 6 mlrd teńge kóleminde qarajat baǵyttalmaq.
2017-shi jyly Aqtas jáne Botaqara kentterinde qazandyqtar salyndy. Qaraǵandy jáne Abaıda «Nurly jol» baǵdarlamasy boıynsha jylý jelilerin qalypqa keltirý jumystary júrgizildi.
