Bıyl Temirtaý qalasynda qandaı ózgerister bolady - ákim esebi
QARAǴANDY. QazAqparat - Temirtaý qalasynyń ákimi Ǵalym Áshimov turǵyndar aldynda esep berdi. Jurtshylyqpen kezdesýge Qaraǵandy oblysynyń basshysy Jeńis Qasymbek te qatysty, dep habarlaıdy QazAqparat tilshisi.
Temirtaýlyqtar ekologııa, jylý, sýmen qamtamasyz etý, qoǵamdyq kólik jáne basqa da áleýmettik máseleler týraly surady. Atap aıtqanda, turǵyndar Temirtaý qalasynyń ákimine ǵana emes, Qaraǵandy oblysynyń basshysyna da óz suraqtaryn joldady.
Jeńis Qasymbek 2019 jyly óńirde qol jetkizilgen jetistikter jaıly aıtyp, jaqyn arada metallýrgter qalasyna qatysty kózdelip otyrǵan naqty josparlar týraly jetkizdi.
«Bıyl Temirtaýda kópqabatty turǵyn úılerdegi lıftterdi aýystyrý boıynsha aýqymdy baǵdarlamany iske qosamyz. Qalada jumys istemeıtin barlyǵy 196 kótergish bar. Jyldar boıy sizder toǵyzynshy qabatqa jaıaý kóterilýge úırenip qalǵan shyǵarsyzdar. Bul, árıne, durys emes. Bıyl 59 lıft, al kelesi jyly 67 lıft aýystyrylatyn bolady. Qalǵandaryn 2022 jyly jańartamyz. Sondaı-aq, osy jyldan bastap qoǵamdyq kólikti jańartýǵa kirisemiz. Sizder ózderińiz kórip otyrsyzdar, qazirgi jumys istep jatqan avtobýstar eshbir syn kótermeıdi – olar eski jáne jaıly emes. Temirtaýda kún saıyn 200 avtobýs jolǵa shyǵady. Aldaǵy jyldary barlyǵyn aýystyrýdy josparlap otyrmyz», - dedi aımaq basshysy.
Sonymen qatar, ol aǵymdaǵy jyly Temirtaý qalasynda jáne óńirdiń barlyq aımaǵynda turǵyn úıler men áleýmettik nysandar qurylysynyń kólemi ulǵaıatynyn atap ótti. Osy jyldyń naýryz aıynda qalada 20 myń adamǵa arnalǵan emhana jumys isteı bastaıdy. Sáýir aıynda 320 kórermenge arnalǵan dene shynyqtyrý-saýyqtyrý ortalyǵy ashylady. Nysandar «ArselorMıttal Temirtaý» qarjysy esebinen salynyp jatyr.
Kezdesýge kelgen qala turǵyndaryn ekologııa jáne kógaldandyrý máselesi qyzyqtyrdy. Bul baǵyttaǵy jumystar jáne qara qar máselesi qalaı sheshilip jatqany týraly Temirtaý qalasynyń ákimi Ǵalym Áshimov baıandap berdi.
«Bul másele turaqty baqylaýda. Qaladaǵy ekologııalyq jaǵdaıdy jaqsartý boıynsha úsh jyldyq kezeńge arnalǵan keshendi jospar ázirlendi. Jeke sektordy gaz otynyna kóshirý boıynsha is-sharalar josparlanǵan. Ol úshin «Saryarqa» magıstraldy gaz qubyry salynady. Qazir birinshi kezektegi qurylys jumystary júrip jatyr, jaqyn arada Áleýmettik qala shaǵynaýdanynda jáne Otradnoe kentinde 700 jeke úı gazdandyrylady. Bul ekologııalyq problemalardyń kóp bóligin sheshýge kómektesedi», - dedi ol.
Ǵalym Áshimov ótken jyly qalada 3 984 aǵash otyrǵyzylǵanyn habarlady.
Temirtaýlyqtar sýmen qamtý máselesin de qozǵady. Eski qala shaǵynaýdanyndaǵy kópqabatty úılerdiń turǵyndary jaz aılarynda sýdyń qysymy óte tómen jáne ystyq sýdyń bolmaıtynyna shaǵymdandy. Qala ákimi mamandarǵa qajetti ólsheýler júrgizýdi tapsyrdy jáne bıyl qalada sý qubyry jelilerin aýqymdy qaıta qurý bastalatynyn málim etti.
«Buryn kóptegen jeliler ıesiz bolǵan, biz olardy jóndeýge memlekettik bıýdjetten aqsha jumsaı almadyq. Biz úlken jumys júrgizdik, barlyq jelilerdi pasporttadyq, olardy balansqa aldyq, jóndeý jáne jańǵyrtý úshin jobalaý-smetalyq qujattamany ázirledik. Bıyl jumysqa kirisemiz», - dep ýáde berdi ol.
Sondaı-aq, qala turǵyndaryn osy ataýly kúnge oraı qala stellasyn qalpyna keltirý jáne bolattyń alǵashqy quımalarynyń 65 jyldyq mereıtoıyn merekeleý máseleleri qyzyqtyrdy.
