Bıyl Tatarstanda toǵyzynshy synyp oqýshylary tatar tilinen emtıhan tapsyrýǵa mindetteldi
ASTANA. 29 aqpan. QazAqparat - Bıyldan bastap Memlekettik qorytyndy attestatsııadan (MQA) ótý úshin 9 synyp oqýshylary tatar tilinen emtıhan tapsyrady.
Respýblıkanyń Bilim jáne ǵylym mınıstriniń orynbasary Lıýdmıla Nuǵymanovanyń aıtýynsha, ony dástúrli túrde de, test túrinde de tapsyrýǵa bolady, dep habarlaıdy Ýtro.rý.
REGNUM aqparat agenttigi habarlaǵandaı, Qazan qalasyndaǵy «RF-daǵy ulttyq respýblıkalar mektepterindegi orys tili» qoǵamynyń belsendisi Ekaterına Belıaevanyń aıtýynsha, mundaı talap zańǵa qaıshy jáne ony Tatarstannyń Bilim jáne ǵylym mınıstri Albert Gılmýtdınovtiń buıryqpen bekitkendigi aqylǵa syımaıdy. Bul buıryq kúshine enisimen, atalmysh qoǵamnyń belsendileri RF Bilim jáne ǵylym mınıstrligine hat joldaǵan.
Hatqa áli jaýap kele qoıǵan joq, alaıda RF zańdary boıynsha kez kelgen bilim berý mekemesinde memlekettik qorytyndy attestatsııadan ótý kezinde tek orys tili men matematıka ǵana mindetti pánder bolyp sanalady. Al basqalaı jalpylama pánder boıynsha emtıhan tapsyrý túlekterdiń tańdaýy boıynsha erikti túrde júrgizilýi tıis.
