Bıyl tamyzda álemniń eń myqty taekvondoshylary Astanaǵa taban tireıdi
ASTANA. QazAqparat - 2014 jylǵy tamyzda Astanada taekvondodan «Búkilálemdik Gran-prı serııasy» týrnıri ótedi. Mundaı sheshimdi Qytaıdyń Taıpeı qalasynda ótken bas assambleıada Búkilálemdik taekvondo federatsııasy (WTF) qabyldady.
Qazaqstan taekvondo federatsııasynyń málimetinshe, «Búkilálemdik Gran-prı serııasy» jobasy 2013 jyly qarashada bastaý alǵan. Bul jarysqa tek belgilengen upaı sanyn jınap, álemdik deńgeıge kóterilgen sporshylar ǵana qatysa alady. Bıylǵy tamyzda Astana osy jarysty qabyldaıtyn ekinshi qala bolmaq. Birinshi jarys shildede Qytaıdyń Sýchjoý qalasynda, úshinshisi qazanda Anglııanyń Manchester qalasynda, tórtinshisi jeltoqsanda Meksıkanyń Keretaro qalasynda ótedi.
Aıta ketý kerek, QR jastar komandasynyń múshesi Serikbaı Ǵalymjan Qytaıdyń Nankın qalasynda ótetin jastar arasyndaǵy Olımpıada oıyndaryna qatysýǵa joldama utyp aldy. Ol 16-28 tamyz aralyǵynda ótedi.
