Bıyl Taldyqorǵannyń 412 turǵynyn ıt qapqan
TALDYQORǴAN. QazAqparat - Bıyl Taldyqorǵannyń 412 turǵynyn ıt qapqan. Adamdardy qapqan ıtterdiń 170-ke jýyǵynyń ıesi belgisiz, dep habarlaıdy QazAqparat tilshisi qalalyq veterınarlyq bólim ókilderine silteme jasap.
Veterınarlyq bólim mamandarynyń aıtýynsha, adamdardy ıt qabý kórsetkishi jyl sanap artyp keledi. Al qoǵamdyq densaýlyq saqtaý departamenti bul qutyrma jáne ehınokokoz aýrýynyń taraýyna yqpal etedi dep dabyl qaǵyp otyr.
«Buralqy ıtterden qaýip kóp. Máselen, adamǵa ıt, mysyqtan qutyrma jáne ehınokokoz aýrýlary juǵady", - deıdi mamandar. Osyǵan baılanysty juqpanyń aldyn alý maqsatynda mamandar shaharǵa qarasty aýyl turǵyndarymen kezdesý ótkizgen. Halyqqa úı janýarlaryna tıisti ekpeler jasaý mańyzdylyǵyn túsindirý jumystary da qolǵa alynǵan. 
Budan bólek, tekserý kezinde ıtterde aýrý belgisi bolsa, mamandar ıesin tabýǵa tyrysady. Al bolmaǵan jaǵdaıda olardy atatyndaryn eskertedi. Bıyl osy jumystarǵa oblys bıýdjetinen 6 mln. teńge bólingen. Jalpy, qalalyq veterınarııa bólimine bıyl 950 shaǵym túsip, 2300 ıt pen mysyqtyń kózi joıylǵan.
Mamandardyń aıtýynsha, sońǵy jyldary qańǵybas tórtaıaqtylar kóbeımese, azaımaı otyr. Onyń negizgi sebebi turǵyndardyń olarǵa beı-jaı qaraýynan da eken.
