Bıyl Taldyqorǵanda jol oqıǵasy saldarynan 6 adam qaza taýyp, 157 adam jaraqat alǵan

TALDYQORǴAN.QazAqparat - Bıyl Jetisý oblysynyń ortalyǵy Taldyqorǵanda 12 myńǵa jýyq jol erejelerin buzý faktisi tirkelgen, - dep habarlaıdy QazAqparat tilshisi.

«Júrgizilgen taldaýǵa sáıkes, Taldyqorǵan qalasynyń aýmaǵynda aǵymdaǵy jyldyń 6 aıynda 94 jol-kólik oqıǵasy oryn alyp, saldarynan 6 adam qaza taýyp, 157 adam jaraqat alǵan (túrli dárejedegi dene jaraqattary).

Jyldyń basynan bastap patrýldik polıtsııa rotasynyń qyzmetkerleri jol qozǵalysy erejelerin buzýdyń 11 475 deregin anyqtady, onyń ishinde mas kúıinde kólik júrgizgeni úshin 47 júrgizýshi ustaldy. Mamandandyrylǵan aıyppul turaǵyna 635 kólik quraly qoıyldy», - delingen Jetisý oblystyq Polıtsııa departamenti baspasóz qyzmetiniń habarlamasynda.

Aıta keteıik, shildeniń 18-nen bastap rempýblıkalyq «Qaýipsiz jol» is-sharasy ótkizilýde.

«Jazǵy demalysqa baılanysty Taldyqorǵanda kólik quraldary sanynyń óskendigin atap ótý qajet. Osy kezeńde jol-kólik oqıǵalary artady. Osyǵan baılanysty, joǵaryda atalǵan is-shara sheńberinde polıtseıler patrýldeýdi, avtokólik quraldaryn, onyń ishinde jolaýshylar kóligin tekserýdi kúsheıtedi. Jol qozǵalysy erejelerin buzýǵa jol bermeýge, olardy basqarý kezinde muqııat bolýǵa, jyldamdyqty asyrmaýǵa, al jaıaý júrginshilerge joldy qatań belgilengen oryndarda, jaıaý júrginshiler ótkelderinde nemese baǵdarshamnyń ruqsat beretin jerinen ótýdi eske salamyz», - dep tolyqtyrdy atalǵan vedomstvonyń baspasóz qyzmeti.